საქართველოს შინაგან საქმეთა სამინისტროს ინფორმაციით, განმუხურში ბიზნესმენის მკვლელობაში ბრალდებული დაკავებულია. უწყებაში ამბობენ, რომ ის 1966 წელს დაბადებული კ.კ.-ა.

შსს-ს ცნობით, მან ბიზნესმენს მრავლობითი ჭრილობა მიაყენა და მიიმალა, დაჭრილი კი საავადმყოფოში გადაყვანამდე გარდაიცვალა.

"წარსულში არსებული კონფლიქტის გამო მომხდარი ურთიერთშელაპარაკების შედეგად, ნაცნობს — 1954 წელს დაბადებულ ვ.ვ-ს მისსავე საცხოვრებელ სახლში დანით გულმკერდის არეში მრავლობითი ჭრილობა მიაყენა და შემთხვევის ადგილიდან მიიმალა", — აცხადებენ უწყებაში.

მათივე ინფორმაციით, ბრალდებული ცხელ კვალზე დააკავეს და უკვე ამოღებულია დანაშაულის ჩადენის იარაღი — დანა.

გამოძიება საქართველოს სისხლის სამართლის კოდექსის 108-ე მუხლით მიმდინარეობს, რაც განზრახ მკვლელობას გულისხმობს. ბრალის დამტკიცების შემთხვევაში, დანაშაული 7-დან 15 წლამდე ვადით თავისუფლების აღკვეთას ითვალისწინებს.

განმუხურში ბიზნესმენის მკვლელობის შესახებ ინფორმაცია პირველ სექტემბერს გავრცელდა.