პრემიერმინისტრი, ირაკლი ღარიბაშვილი ისევ დაესხა თავს ოპოზიციურ მედიებს და განაცხადა, რომ მათი ყურება წარმოუდგენელია. ღარიბაშვილის მტკიცებით, ამ არხებს 2 წელია აღარ უყურებს, მაგრამ იქვე ვრცლად საუბრობს მათი მუშაობის სპეფიციკაზე და შიშის დათესვასა და პროპაგანდაში ადანაშაულებს.

მან მთავარ არხს "გარყვნილების პროპაგანდა" უწოდა და ტელევიზია, TV პირველთან და ფორმულასთან ერთად, ხალხის წინააღმდეგ ბრძოლაში დაადანაშაულა.

"კარგად გვახსოვს, ჩვენ ჩამოვთვალეთ ციხეში მდგომარეობა, წამება, გაუპატიურება, ბიზნესს როგორ არეკეტებდნენ და, ასე ვთქვათ, ართმევდნენ ქონებას, ადამიანებს ანადგურებდნენ და, მეორე მხრივ, რას ვუყურებდით ჩვენ ტელევიზიების საშუალებით. მედიაგარემო სრულად იყო მონოპოლიზებული და არავითარი სივრცე არ იყო დატოვებული თავისუფალი სუნთქვის და ადამიანს არ ეძლეოდა საშუალება თავისუფალი სიტყვის გამოხატვის.

დღეს, მას შემდეგ, რაც ეს ადამიანები გადავიდნენ, ქართველი ხალხის გადაწყვეტილებით, ოპოზიციაში, იმ დღიდან ყველაფერი ამოტრიალდა — ქვეყანა თითქოს დაინგრა, ყველაფერი მანამდე იყო იდეალური, სამოთხე იყო და თითქოს მეორე დღესვე, პირველ ოქტომბერს, თითქოს დადგა ჯოჯოხეთი. აი, ასეთი მეთოდებით იბრძვიან, დღემდე ძალადობენ ჩვენს მოსახლეობაზე.

ჩართეთ მათი ტელევიზორები, ორი წელია აღარ ვუყურებ და მართლაც წარმოუდგენელია ამ ტელევიზიას უყურო: მთავარ არხს, TV პირველს და ფორმულას, ეს ერთი ხელწერაა და ამ მეთოდებით იბრძვიან ქართველი ხალხის წინააღმდეგ", — განაცხადა მან.

ეს პირველი შემთხვევა არ არის, როდესაც პრემიერმინისტრი, ისევე, როგორც ქართული ოცნების სხვა ლიდერები ოპოზიციურ და კრიტიკულ მედიას თავს ესხმიან. დიდი ხნის განმავლობაში ისინი საერთოდ უარს ამბობდნენ მათთან კომუნიკაციაზე, ეთერებში მისვლასა და ინდივიდუალური კომენტარების ჩაწერაზე.

მმართველი გუნდი მსგავსი დამოკიდებულების გამო არაერთხელ გააკრიტიკა მედიის საკითხებზე მომუშავე არასამთავრობო ორგანიზაციებმა. ისინი აღნიშნავდნენ, რომ ეს აძლიერებს პოლარიზაციას და ჟურნალისტებს საფრთხეს უქმნის, რადგანაც ახალისებს ძალადობრივ ჯგუფებს.