მოსალართლე ლევან მურუსიძე ევროკავშირის მიერ პერსონალურ სანქციებთან დაკავშირებით გავრცელებულ ინფორმაციას ლექსით პასუხობს.

"ზოგადად, არ ვიცი, კომენტარს ვერ გავაკეთებ, ის არის რა ჰქვია, თქვენ პოეზია გიყვართ ზოგადად? ერთი ესეთი ლექსია: "არცა ვყოფილვარ ლაჩარი, არცა ვყოფილვარ მშიშარა; ცხოვრებამ ოხერ-ტიალმა ბევრჯერაც მიმტრო, მიშარა; თვალამღვრეული დავდივარ, მიშავ და არამიშავ რა–ო, გამიგეთ?", — აცხადებს ის ფორმულასთან სატელეფონო საუბარში.

მისივე თქმით, "არაფერი ისეთი" არ ჩაუდენია, რომ სანქციები დაუწესონ.

"თუ ჩემზე იქნება პერსონალური სანქციები, შესაბამისად, მერე გაგცემთ პასუხს, მე მიმაჩანია, ზოგადად, რომ არაფერი ისეთი არ ჩამიდენია, რომ ჩემზე პირადად რამე სანქციები იყოს, წარმოდგენა არ მაქვს რა, მე ვარ რიგითი მოსამართლე, ვიხილავ საქმეებს", — თქვა მან.

ბოლო რამდენიმე დღეა სხვადასხვა მედიაში ვრცელდება ინფორმაია, რომ შესაძლოა, ევროკავშირმა მოსამართლეების ნაწილს პერსონალური სანქციები დაუწესოს. აღსანიშნავია, რომ ლევან მურუსიძე ერთ-ერთი ლიდერია იმ მოსამართლეებს შორის, რომლებიც ე.წ. კლანის წევრებად მიიჩნევიან.

გუშინ, 31 აგვისტოს, პრემიერმინისტრმა ირაკლი ღარიბაშვილმა განაცხადა, რომ საქართველო თავს შეიკავებს ევროკავშირისგან მაკროფინანსური დახმარების მეორე ნაწილის, 75 მილიონი ევროს აღებაზე. ღარიბაშვილმა ეს გადაწყვეტილება საგარეო ვალის შემცირების სურვილით ახსნა. მანამდე, 30 აგვისტოს, ქართული ოცნების თავმჯდომარემ, ირაკლი კობახიძემ განაცხადა, რომ ევროკავშირისგან მაკროფინანსურ დახმარებას "ფინანსური დატვირთვა აღარ აქვს".

საქართველოში ევროკავშირის წარმომადგენლობის ხელმძღვანელის მოვალეობის დროებითი შემსრულებლის, ჟულიენ კრამპის განცხადებით, პატივს სცემენ ხელისუფლების გადაწყვეტილებას, არ მიიღოს ევროკავშირის მაკროფინანსური დახმარება, თუმცა აქვე აღნიშნავენ, რომ საქართველომ მისი მიღების პირობები ვერ შეასრულა. ევროკავშირის განცხადებით, საქართველოსთვის გასაცემი დახმარება დამოკიდებული იქნება ძირითადი რეფორმების განხორციელებისას მიღწეულ წინსვლაზე.

აღსანიშნავია, რომ 24 აგვისტოს, ღარიბაშვილთან შეხვედრის შემდეგ, ევროპული საბჭოს პრეზიდენტმა, შარლ მიშელმა განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროფინანსური დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".