ევროპული საქართველოს პოლიტსაბჭოს თავმჯდომარის, გიგი წერეთლის განცხადებით, ის, რომ საქართველო ევროკავშირისგან დახმარებას ვერ მიიღებს, ქართული ოცნების დამსახურებაა. მისივე თქმით, ეს გარკვეულწილად სანქციის ფორმაა.

"[მათი პოლიტიკა] არის შეუთავსებელი ზოგადად ევროკავშირის ვალდებულებებთან — იმ ხელშეკრულებიდან გასვლა, ზოგადად დემოკრატიის მდგომარეობა და საერთოდ ის ქცევა და ის, ასე ვთქვათ, მოდელი მმართველობის, რომელიც საქართველოშია", — განაცხადა წერეთელმა.

ამ თემაზე ისაუბრეს სხვა ოპოზიციური პარტიების ლიდერებმაც. ლელოს ლიდერი, მამუკა ხაზარაძე ამბობს, რომ დახმარების მეორე ნაწილის აღებაზე უარის თქმა ქვეყნისა და ხალხის წინაშე უპასუხისმგებლობაა. ენმ-ს დეპუტატი რომან გოცირიძე კი აცხადებს, რომ მთავრობამ წინმსწრებად თქვა უარი ევროკავშირის დახმარებაზე, რათა ის სანქციად არ გამოცხადებულიყო.

პრემიერმინისტრის, ირაკლი ღარიბაშვილის განცხადებით, გადაწყვეტილი აქვთ, რომ ევროკავშირისგან მაკროსაფინანსო დახმარების მეორე ნაწილის აღებისგან თავი შეიკავონ, რადგან მთავრობამ დაიწყო საგარეო ვალის შემცირება და ამ თანხის მიღების აუცილებლობა, სავარაუდოდ, აღარ იქნება.

ამასთანავე, გუშინ, 30 აგვისტოს, ქართული ოცნების თავმჯდომარემ, ირაკლი კობახიძემ განაცხადა, რომ ევროკავშირისგან მაკროსაფინანსო დახმარებას "ფინანსური დატვირთვა აღარ აქვს".

24 აგვისტოს, პრემიერ ღარიბაშვილთან შეხვედრის შემდეგ, ევროპული საბჭოს პრეზიდენტმა, შარლ მიშელმა განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროსაფინანსო დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".