ქართული ოცნების თავმჯდომარე, ირაკლი კობახიძე ამტკიცებს, რომ პარტიის ყოფილ თავმჯდომარესთან, ბიძინა ივანიშვილთან კომუნიკაცია იანვრის შემდეგ არ ჰქონია.

"იანვარში შედგა როგორც გახსოვთ ჩვენი პარტიის ყრილობა და ყრილობის წინა დღეებში შედგა ბოლო კომუნიკაცია და ბოლო შეხვედრა", — განაცხადა კობახიძემ პალიტრანიუსის ეთერში.

ის ამტკიცებს, რომ ქართულ ოცნებაში გადაწყვეტილებებს "კოლეგიური მართვის წესით" იღებენ, მისი, როგორც პარტიის თავმჯდომარის როლი კი ამ პროცესის კოორდინაციაა.

"ქართულ ოცნებაში გადაწყვეტილებები მიიღება კოორდინაციის საფუძველზე. ამ კოორდინაციას უზრუნველყოფაზე ვარ პასუხისმგებელი მე, როგორც პარტიის თავმჯდომარე, თუმცა საკვანძო პოლიტიკური გადაწყვეტილებები მიიღება პარტიის პოლიტსაბჭოს მიერ. ანუ, ჩვენ გვაქვს კოლეგიური მართვის წესი და ზუსტად ასეთი წესით ვიღებთ გადაწყვეტილებებს. რაც შეეხება ჩემს როლს, ჩემი მთავარი როლი არის ამ გადაწყვეტილების მიღების პროცესის კოორდინაცია. გახლავართ როგორც პარტიის თავმჯდომარე, ასევე პოლიტსაბჭოს თავმჯდომარე და სწორედ ასეთი კოორდინაციით მიიღება გადაწყვეტილება პოლიტიკური საბჭოს მიერ", — განაცხადა კობახიძემ.

ქართული ოცნების დამფუძნებელი და ყოფილი თავმჯდომარე პოლიტიკიდან მეორედ 2021 წლის 11 იანვარს წავიდა. ამის შესახებ საზოგადოებას მან ფეისბუქში გამოქვეყნებულ საჯარო წერილით აცნობა. მან განაცხადა, რომ პარტიის ლიდერებთან პოლიტიკურ თემებზე აღარ ისაუბრებდა და კონსულტაციებსაც აღარ გაუწევდა. რამდენიმე დღის შემდეგ, 16 თებერვალს პარტიის ყრილობაზე თავმჯდომარედ ირაკლი კობახიძე ერთხმად დაამტკიცეს.