სტრატეგია აღმაშენებლის ერთ-ერთი ლიდერის, სერგო ჩიხლაძის განცხადებით, მესამე ძალაში წარმოდგენილი იქნება ნაციონალური მოძრაობის ყოფილი თავმჯდომარე, გრიგოლ ვაშაძე.

"მესამე ძალა არის ღია პლატფორმა, რომელშიც ერთიანდებიან და გაერთიანდებიან როგორც პოლიტიკური ძალები, ასევე, ცალკეული ინდივიდები, ცალკეული წარმატებული პროფესიონალები და ამის შესახებ ხვალ გავაკეთებთ განაცხადს, ხვალ იქნება კამპანიის გახსნა, ხვალ იქნება მესამე ძალის პრეზენტაცია, ჩვენ წარვდგებით პირველი ნომრით ამ არჩევნებზე, რომლის ნაწილიც იქნება სტრატეგია აღმაშენებელი, ასევე, ცალკეული ინდივიდები, მათ შორის, ბატონი გრიგოლ ვაშაძეც იქნება მესამე ძალის ფარგლებში წარმოდგენილი", — განაცხადა ჩიხლაძემ პირველი არხის ეთერში.

საქართველოში თვითმმართველობის არჩევნები 2 ოქტომბერს იქნება. როგორც მმართველმა პარტიამ, ასევე, ოპოზიციური პარტიების ნაწილმა საკუთარი კანდიდატები ქვეყნის მასშტაბით უკვე წარადგინეს.