დედის შვილისადმი სიყვარული რომ უსაზღვროა ეს კიდევ ერთხელ დაამტკიცა კალიფორნიელმა ქალმა, რომელიც 5 წლის შვილის გადასარჩენად პუმას შიშველი ხელებით შეებრძოლა. ცხოველი 30 კილოგრამს იწონიდა.

რამდენიმე დღის წინ სახლში მყოფ დედას ხმაური შემოესმა. როგორც აღმოჩნდა, სახლის წინ თამაშში გართულ 5 წლის ბავშვს თავს პუმა დაესხა და მის წათრევას ცდილობდა. ქალი მაშინვე გაიქცა და პუმას მუშტები დაუშინა, რათა შვილი ცხოველისგან დაეხსნა. როგორც კი შვილი გარეულ ცხოველს გამოგლიჯა, მაშინვე მანქანაში ჩაჯდა და ბავშვი საავადმყოფოში წაიყვანა. გზაში პოლიციას დაუკავშირდა და ცხოველის ადგილსამყოფელის შესახებ შეატყობინა.

ადგილზე მისულმა პოლიციელებმა დაასკვნეს, რომ აგრესიული პუმა საზოგადოებისთვის საფრთხეს წარმოადგენდა და მოკლეს.

"ამ ისტორიის ნამდვილი გმირი დედაა, რადგან მან შვილის სიცოცხლე გადაარჩინა", — განაცხადა პოლიციელმა პატრიკ ფოიმ.

ბიჭს ცხოველმა ღრმა ჭრილობები მიაყენა, მათ შორის — თავის არეშიც. პოლიციის განცხადებით, ბიჭი ლოს-ანჯელესის საავადმყოფოში იმყოფება და ამჟამად სტაბილურ მდგომარეობაშია.