სალომე ზურაბიშვილი აცხადებს, რომ მას, როგორც პრეზიდენტს, აქვს საზოგადოების აცრაში დარწმუნების მოვალეობა. ამის შესახებ მან ვიდეომიმართვაში ისაუბრა, სადაც ის მოსახლეობას მარიამობას ულოცავს და ამბობს, რომ საქართველო კია მისი მფარველობის ქვეშ, მაგრამ ეს არ ნიშნავს, რომ ქვეყნის და მომავალი თაობების გადასარჩენად ყველა საშუალება არ გამოვიყენოთ.

"გილოცავთ მარიამობას! როგორც ღვთისმშობლის წილხვედრი ქვეყანა, საქართველო მისი მფარველობის ქვეშ იმყოფება და მით უფრო, დღევანდელი განსაცდელის დროს, ჩვენ მას ვებარებით. თუმცა, ეს არ ნიშნავს და არ უნდა ნიშნავდეს იმას, რომ ჩვენ ჩვენი ოჯახების, ახლობლებისა და ჩვენი პატარა ქვეყნის მომავალი თაობების გადასარჩენად არ უნდა გამოვიყენოთ ყველაფერი, რისი საშუალებაც გაგვაჩნია. აცრაზე უარის თქმა სხვებსაც უქმნის საფრთხეს და ეს საფრთხე ჩვილ ბავშვებსა და ორსულ ქალებს, ანუ ჩვენი ქვეყნის მომავალს ემუქრება.

ამიტომ მიმაჩნია, რომ როგორც ამ ქვეყნის პრეზიდენტს, მაქვს განსაკუთრებული მოვალეობა, დაგარწმუნოთ ყველა — ერი და ბერი, ექიმი და ექთანი, პედაგოგი და სტუდენტი, დიდი და პატარა, რომ აცრა ცოდვა კი არა, სამოქალაქო ვალდებულება და დღევანდელ დღის პატრიოტიზმის უდიდესი გამოხატულებაა! თავისუფლება არ ნიშნავს სხვისი სიცოცხლის საფრთხის ქვეშ დაყენების თავისუფლებას", — აცხადებს სალომე ზურაბიშვილი.