კომუნიკაციების კომისიამ რამდენიმე ტელევიზიას ქართული ოცნების მიერ გამოქვეყნებული საზოგადოებრივი აზრის კვლევის არასრულად გაშუქების გამო სამართალდარღვევა დაუდგინა.

მათი განცხადებით, საზოგადოებრივმა მაუწყებელმა, აჭარის საზოგადოებრივი მაუწყებლის ტელევიზიამ, რადიომ, ტელეიმედმა, ტელეკომპანია პირველმა, ფორმულამ, რუსთავი 2-მა და სტუდია მაესტრომ 23 აგვისტოს მმართველი გუნდის მიერ გამოქვეყნებული საზოგადოებრივი აზრის კვლევა კანონდარღვევით გააშუქეს.

"კერძოდ, მაუწყებლების მიერ დაირღვა "საქართველოს საარჩევნო კოდექსი", რომლის მიხედვითაც არჩევნებთან დაკავშირებული საზოგადოებრივი აზრის გამოკითხვის შედეგების გამოქვეყნებისას მაუწყებელი ვალდებულია მიუთითოს კვლევის თარიღი, გამოკითხვის მეთოდი, გამოკითხვაში გამოყენებული კითხვების ზუსტი ფორმულირება და შესაძლო ცდომილების ფარგლები. კანონმდებლობის აღნიშნული ვალდებულება შვიდივე მაუწყებლის მიერ დაირღვა, რის საფუძველზეც, კომუნიკაციების კომისიამ სამართალდარღვევის ოქმები შეადგინა და განსახილველად სასამართლოს წარუდგინა", — აცხადებენ კომისიაში.