ნაციონალური მოძრაობის წევრის, ხატია დეკანოიძის განცხადებით, ვაქცინაციის პოპულარიზაციისთვის მთავრობამ სრულად ვაქცინირებულ მოქალაქეებს კომუნალური გადასახადები სამი თვით უნდა გაუუქმოს, ასევე, წლის ბოლომდე მათთვის განახევრდეს ტრანსპორტის ფასი წლის ბოლომდე. გარდა ამისა, დეკანოიძე ამბობს, რომ სრულად ვაქცინირებულ სოციალურად დაუცველებს ერთი თვის დახმარება დამატებით უნდა მიეცეთ, ხოლო სრულად ვაქცინირებულ პენსიონერებს — ნახევარი თვის პენსია. ენმ-ის წევრი ამბობს იმასაც, რომ სრულად ვაქცინირებულ თვითდასაქმებულებს წლიური საშემოსავლო გადასახადი უნდა გაუნახევრდეთ.

გარდა ამისა, ხატია დეკანოიძე მიიჩნევს, რომ ეპიდემიოლოგებმა უნდა წარმოადგინონ პროგნოზი, ტრაექტორია, სად მიდის ქვეყანა ეპიდსიტუაციის მიმართულებით. მისივე თქმით, სამედიცინო ფაკულტეტების დამამთავრებელი კურსის სტუდენტები უნდა გადამზადდნენ და ეს პრივილეგია მათ რეზიდენტურის გამოცდებზე და დღეებზე ჩაეთვალოთ.

"ეს ნაბიჯები არის მნიშვნელოვანი იმისთვის, რომ ჩვენს თანამოქალაქეებში გავზარდოთ ვაქცინაციის პოპულარიზაცია, დავიცვათ ადამიანების სიცოცხლე", — აღნიშნა მან.

ამასთან, დეკანოიძე მოუწოდებს ხელისუფლებას, დაუყოვნებლივ, დამატებით შემოიტანონ ვაქცინები ბუსტერ დოზებისთვის.

მისივე თქმით, ეპიდსიტუაციასთან დაკავშირებით პასუხისმგებლობა ირაკლი ღარიბაშვილსა და მის გუნდს ეკისრება. მისი თქმით, მძიმე ვითარებაში ხელისუფლებამ არაფერი გააკეთა ვაქცინაციის პოპულარიზაციისთვის, მათ შორის, ჰოსპიტალური სექტორის გამართვის მიზნით.

26 აგვისტოს მონაცემებით, საქართველოში კორონავირუსის 4 128 ახალი შემთხვევა დადასტურდა, გამოჯანმრთელდა 5 611, ხოლო გარდაიცვალა — 79 ადამიანი.

ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების რაოდენობა შეადგენს 531 171-ს, გამოჯანმრთელდა — 468 917, ხოლო ვირუსს ჯამში ემსხვერპლა 7 028 ადამიანი.