თბილისის მერმა, კახა კალაძემ დედაქალაქის მთავრობის სხდომის დაწყებამდე მოქალაქეებს ვაქცინაციის პროგრამაში ჩართვისკენ, პირბადის ტარებისა და სოციალური დისტანციის დაცვისკენ მოუწოდა. ის ამბობს, რომ კორონავირუსისთან ბრძოლა მხოლოდ თითოეული ადამიანის პასუხისმგბელიანი ქცევითაა შესაძლებელი.

"მინდა სხდომა დავიწყო თხოვნით, მოწოდებით, [რომ] ვატაროთ პირბადე, დავიცვათ დისტანცია და ჩავერთოთ ვაქცინაციის პროგრამაში. სხვა გზა, სხვა გამოსავალი შექმნილი სიტუაციიდან არ არსებობს. ჩვენ ვიმყოფებით ომში და ამ ომში აუცილებლად უნდა გავიმარჯვოთ. უნდა გავიმარჯვოთ ერთმანეთის დახმარებით და მხარდაჭერით.

დღეს ბრძოლის ხაზი გადის თითოეული ადამიანის პასუხისმგებლობაზე და სწორედ ჩემზე, შენზე, თქვენზე, ჩვენზეა დამოკიდებული გავიმარჯვებთ თუ არა ამ ბრძოლაში. დამეთანხმებით, ალბათ, რომ ნებისმიერი თემა უფერულდება იმის ფონზე, რაც ჩვენს ყოველდღიურობაში ხდება", — განაცხადა კახა კალაძემ.

დღის წესრიგით გათვალისწინებული საკითხების განხილვამდე დედაქალაქის სხდომაზე წუთიერი დუმილით პატივი მიაგეს კორონავირუსით გარდაცვლილი ადამიანების ხსოვნას.

ბოლო 24 საათში საქართველოში კორონავირუსით 79 ადამიანი გარდაიცვალა.