თბილისის მერიის განცხადებით, მაჭავარიანის ქუჩა ხვალ, 26 აგვისტოს საღამოს ორმხრივად გაიხსნება. მათივე თქმით, მეწყრულ ზონაში საპრევენციო სამუშაოების ძირითადი ეტაპი და მაჭავარიანის ქუჩისა და გელოვანის გამზირის დამაკავშირებელი ახალი გზის ინფრასტრუქტურული სამუშაოების მთავარი ნაწილიც დასრულდა.

"მთელი ამ ხნის განმავლობაში მიმდინარეობდა გამაგრებითი სამუშაოები, რათა აქ გადაადგილება უსაფრთხო ყოფილიყო. მეწყერულ ზონებთან დაკავშირებული, მსოფლიოში არსებული ყველა მაღალი დონის ტექნოლოგია იქნა გამოყენებული. რაც მთავარია, მაჭავარიანის ქუჩაზე გადაადგილება უსაფრთხოა. ხვალ საღამოდან გადაადგილება ორმხრივად იქნება შესაძლებელი", — განაცხადა კალაძემ ვიდეომიმართვაში.

მისი თქმით, ამჟამად მოწყობილია ასფალტის საფარის ქვედა ფენები, გამაგრებითი სამუშაოების დასრულების შემდეგ კი გზის ზედა ფენაც დაიგება. მისივე თქმით, მაჭავარიანის ქუჩაზე უახლოეს მომავალში ლედ განათების სისტემაც დამონტაჟდება.

მაჭავარიანის ქუჩის მიმდებარედ, ვაშლიჯვრის ფერდზე მიწის ნაწილი მარტში ჩავარდა. გზაზე მოძრაობა სწორედ მაშინ შეიზღუდა. მერიამ მეწყერსაშიში ფერდის გამაგრების სამუშაოები დაიწყო. სეისმოლოგების ნაწილი აცხადებდა, რომ ეს პრობლემას ვერ მოაგვარებს.

გაიგეთ მეტი: