კოალიცია მედიის ადვოკატირებისთვის განცხადებით, ჟურნალისტ ვახო სანაიას საქმეზე მართლმსაჯულება სათანადოდ არ აღსრულებულა. მათი თქმით, ჟურნალისტისა და მის ოჯახის წევრებზე თავდასხმის ფაქტისადმი სასამართლოს რბილი დამოკიდებულება კი წარმოადგენს კრიტიკული მედიის მიმართ აგრესიის გაზრდის კიდევ ერთ საფრთხეს.

"სამწუხაროა, რომ მწვავე საჭიროების მიუხედავად, ხელისუფლებას არ გადაუდგამს სათანადო ნაბიჯები მედიაგარემოს გაუმჯობესების მიზნით, სახელმწიფო არ იცავს მედიის წარმომადგენელთა სიცოცხლეს და უსაფრთხოებას. მმართველი პარტიის მაღალჩინოსნები პოლიტიკური ოპონირების რეჟიმში იმყოფებიან კრიტიკულ მედიასთან. ისინი სიძულვილის ენით, აგრესიით და ბოიკოტით პასუხობენ ჟურნალისტების შეკითხვებს და ახალისებენ მედიაზე მორიგ თავდასხმებს", — წერია კოალიციის განცხადებაში.

კოალიცია აღნიშნავს, რომ 5 ივლისის შემდეგ შექმნილი გარემოება კიდევ უფრო ზრდის სასამართლოს პასუხისმგებლობას, სათანადოდ შეისწავლოს ჟურნალისტების დაშინების თითოეული მცდელობა და გადაწყვეტილება მიიღოს პოლიტიკური მოტივების გარეშე.

"სამწუხაროა, რომ ვახო სანაიას საქმესთან დაკავშირებით სასამართლომ რისკები სათანადოდ არ შეაფასა. ამასთან ერთად მიგვაჩნია, რომ მოსამართლის ზეპირი მითითება, რომლითაც თითქოსდა კოვიდრეგულაციებიდან გამომდინარე, მხოლოდ დაზარალებული ჟურნალისტის ადვოკატს შეეზღუდა სხდომაზე დასწრების შესაძლებლობა, წარმოადგენს ადვოკატის პროფესიულ საქმიანობაში დაუსაბუთებელ ჩარევას. ეს შემთხვევა არის საშიში მცდელობა ჟურნალისტები დარჩნენ სამართლებრივი დახმარების გარეშე, უფლებადამცველებს კი აღარ ჰქონდეთ შესაძლებლობა სათანადო მხარდაჭერა აღმოუჩინონ მედიას", — აღნიშნულია განცხადებაში.

განცხადებას ხელს აწერენ:

  • მედიაკლუბი;
  • მედიის განვითარების ფონდი;
  • მედიის უფლებები;
  • რეგიონულ მაუწყებელთა ალიანსი;
  • სატელევიზიო ქსელი;
  • სამართლიანი არჩევნების და დემოკრატიის საერთაშორისო საზოგადოება — ISFED;
  • საქართველოს ახალგაზრდა იურისტთა ასოციაცია — GYLA;
  • საქართველოს დემოკრატიული ინიციატივა — GDI;
  • საქართველოს რეგიონული მედიის ასოციაცია — GRMA;
  • საქართველოს ჟურნალისტური ეთიკის ქარტია;
  • უფლებები საქართველო;
  • ღია საზოგადოების ფონდი OSGF.

ვახო სანაიაზე თავდამსხმელებს მოსამართლე გიორგი კერატიშვილმა 150-საათიანი საზოგადოებისთვის სასარგებლო შრომა და 6-თვიანი პატიმრობა მიუსაჯა. ისინი სანაიას თავს 25 თებერვალს დაესხნენ და სამივე მათგან იმ დღესვე დააკავეს. სწორედ დღეს, 25 აგვისტოს, გავიდა 6 თვე მათი დაპატიმრებიდან, შესაბამისად, სავარაუდოდ, დღესვე გამოვლენ ციხიდან.

გაიგე მეტი: