ფორმულას ჟურნალისტის, ნინო ჟიჟილაშვილი ვახო სანაიას თავდამსხმელების გათავისუფლებასთან დაკავშირებით ამბობს, რომ ეს სრული მწვანე შუქია მათთვის, ვისაც მოუნდება, მედიის წარმომადგენელს ქუჩაში შეურაცხყოფა მიაყენოს.

"რომ გითხრათ, რომ მოულოდნელი იყო, არ ვიქნები მართალი იმიტომ, რომ რაღაც მსგავსის მოლოდინი მქონდა, მით უმეტეს, იმ საყოველთაო დევნის პირობებში, რასაც კრიტიკული მედია დღეს განიცდის, უბრალოდ, მოსამართლეს წარმოუდგენელია, რომ ამ ტიპის სასამართლოში მომუშავე მოსამართლეს მიეღო სხვა ტიპის გადაწყვეტილება. ეს ადამიანები გამოვლენ, გათავისუფლდებიან, რაც იმას ნიშნავს, რომ ყველა დანარჩენს, ვისაც ასე ქუჩაში მოუნდება ჩვენთვის შეურაცხყოფის მოყენება, ან დავალებით, ან საკუთარი ინტერპრეტაციებით მიღებული ინფორმაციის საფუძველზე, მას შეეძლება თავისუფლად გააკეთოს იგივე. თან ეს ხდება 5 ივლისის შემდეგ, მაშინ, როდესაც ჩვენ დავკარგეთ კოლეგა სწორედ მსგავსი წახალისებული ადამიანების მხრიდან აგრესიული ქმედებების შედეგად. ეს არის სრული მწვანე შუქი, თქვენ შეგიძლიათ ქუჩაში გააკეთოთ ის, რაც გინდათ, ამისთვის ან უდანაშაულოდ გცნობენ ან მხოლოდ 6 თვით არ მოიწყენთ, ისე გაატარებთ დროს საკანში", — ამბობს ჟურნალისტი ფორმულას ეთერში.

მისივე თქმით, ამ გადაწყვეტილებით კიდევ ერთხელ დადასტურდა, რომ სასამართლო ხელისუფლების დაქვემდებარებაშია.

"ასე, რომ ეს იყო ჩემთვის მოსალოდნელი, აქ არაფერი ახალი ჩემთვის არ მომხდარა, უბრალოდ, კიდევ ერთხელ დადასტურდა ის, რაც ამ ბანერზე წერია, უკვე საზოგადოებაც დაიღალა ამ თემით, ჩვენ ყველას გვესმის ეს ამბავი, მაგრამ სასამართლო დამონებულია ყველა მიმართულებაში. ხელისუფლებას აქვს სრული მონოპოლია, მედია რჩება ერთადერთ ოაზისად, სადაც მას კონკრეტულ წერტილებში არ აქვს გავლენა და ყველანაირად ეცდება, ქუჩაში სხვადასხვა ფორმით, სახელმწიფო ინსტიტუტების ჩართვით ჩვენ შეგვზღუდოს, ჩვენ შეგვაჩეროს, ჩვენ რაღაცნაირად მოახერხოს, რომ შემომგვიფარგლოს არეალი", — თქვა მან.

ჟურნალისტ ვახო სანაიაზე თავდამსხმელებს მოსამართლე გიორგი კერატიშვილმა 150-საათიანი საზოგადოებისთვის სასარგებლო შრომა და 6-თვიანი პატიმრობა მიუსაჯა. ისინი სანაიას თავს 25 თებერვალს დაესხნენ და სამივე მათგან იმ დღესვე დააკავეს. სწორედ დღეს, 25 აგვისტოს, გავიდა 6 თვე მათი დაპატიმრებიდან, შესაბამისად, სავარაუდოდ, დღესვე გამოვლენ ციხიდან.

ვახო სანაიას თავს 25 თებერვალს დაესხნენ. მას ტვინის შერყევა დაუდასტურდა. ჟურნალისტი ამბობს, რომ მის მიმართ გამოხატული აგრესიის მიზეზი ჟურნალისტური საქმიანობა იყო.

გაიგე მეტი: