პარტია საქართველოსთვის წევრი, კახაბერ ქემოკლიძე აცხადებს, რომ არჩევნები არ უნდა გადაიდოს და ეს, უპირველეს ყოვლისა, ქართულ ოცნებას აწყობს.

"ჩვენი პოზიცია არის, ჩემი აზრით, ძალიან მკაფიო და ძალიან მარტივი — არჩევნები უნდა ჩატარდეს კონსტიტუციურ ვადებში და ყველა ის გამოწვევა, რომელიც დღეს კოვიდკრიზისს უკავშირდება, სახელმწიფომ ყველაფერი უნდა გააკეთოს იმისთვის, რომ სწორი მენეჯმენტით, თანმიმდევრულობით ეს პრობლემები დაარეგულიროს და უსაფრთხოების სრული დაცვით არჩევნები ჩატარდეს იმ კონსტიტუციურ ვადებში და ჩარჩოებში, რომელიც არის დღეს მოცემული. ჩემი აზრით, არ უნდა გადაიდოს და თუკი ვინმეს აწყობს არჩევნების გადადება ეს, უპირველეს ყოვლისა, არის ქართული ოცნება", — განაცხადა ქემოკლიძემ ფორმულას ეთერში.

სახალხო დამცველმა, ნინო ლომჯარიამ განაცხადა, რომ როცა ქვეყანაში დღიურად 60-70 ადამიანი იღუპება და მოქალაქეთა სათანადო რაოდენობა ვაქცინირებული არ არის, არ შეიძლება, "ყველაფერი იყოს ღია". მისი თქმით, ეპიდვითარების დასტაბილურებამდე, საჭიროა რეგულაციების გამკაცრება და არჩევნების გადადებაზე ფიქრი.