დაავადებათა კონტროლის ცენტრის დირექტორის, ამირან გამყრელიძის განცხადებით, სავარაუდოდ, საჭირო გახდება რეგულაციების გამკაცრება. აღნიშნულზე მან საკოორდინაციო საბჭოს სხდომის დასრულების შემდეგ გამართულ ბრიფინგზე განაცხადა.

"რა თქმა უნდა, საჭიროა და ალბათ, საჭირო გახდება კიდევ უფრო გამკაცრება. დღეს საბჭომ მიიღო კონსენსუსით ამ ტიპის გადაწყვეტილება, რაც დღეს მოგახსენეს რესტორნებთან დაკავშირებით. რა თქმა უნდა, იყო სერიოზული მსჯელობა ბევრ სხვა საკითხზე. დღეს ამ ეტაპზე მიღებული იქნა ეს გადაწყვეტილება, მაგრამ ეს არ გამორიცხავს, რომ ხვალ, ზეგ, მაზეგ კიდევ სხვა გადაწყვეტილებები იქნეს მიღებული", — თქვა მან.

მისივე თქმით, პირბადის ტარების მაჩვენებელი 50%-მდეა შემცირებული.

"მთავარი არის ის, რომ ჩვენ, ერთი მხრივ, დავიცვათ ის, რაც არსებობს და კიდევ ერთხელ ყველას გთხოვთ, რომ 50%-ზე ვართ დასული პირბადის ტარებით. ყველაზე ძლიერი რეგულაცია გახლავთ პირბადე. ყველამ ვატაროთ პირბადე, წავიდეთ და ავიცრათ", — განაცხადა გამყრელიძემ.