ჯანდაცვის მინისტრის მოადგილის, თამარ გაბუნიას განცხადებით, ტრანსპორტის შეზღუდვა ეპიდემიის კონტროლს დაეხმარა. ამის შესახებ მან საკოორდინაციო საბჭოს წევრების ბრიფინგზე ისაუბრა.

"ტრანსპორტის შეზღუდვა, რა თქმა უნდა, დაეხმარა ეპიდემიის კონტროლს. ამ შემთხვევაში, ჩვენ უკვე ვხედავთ, რომ არის სტაბილიზაციის მცირედი ნიშნები. ძალიან ადრეა ჯერ საუბარი, რამდენად ამის შენარჩუნება მოხდება, მაგრამ მოგეხსენებათ, მობილობის ნებისმიერი კლება იწვევს კონტროლის უფრო მეტ შესაძლებლობას", — განაცხადა მან.

12 აგვისტოს საკოორდინაციო საბჭომ ახალი შეზღუდვები დააწესა, რომელიც 14 აგვისტოდან 4 სექტემბრამდე, 3 კვირის განმავლობაში იმოქმედებს. კერძოდ:

  • შეიზღუდა მუნიციპალური ტრანსპორტის მოძრაობა, შეზღუდვა არ შეეხო საქალაქთაშორისო ტრანსპორტს;
  • სრულად შეიზღუდა ფესტივალები, მასობრივი ღონისძიებები, კონცერტები და სპორტული შეჯიბრებები, გარდა იმ სპორტული შეჯიბრებებისა, რომელიც იმართება საერთაშორისო ეგიდით;
  • შეიზღუდა ბავშვთა გასართობი ცენტრების მუშაობა;
  • საჯარო უწყებებს ეძლევათ დავალება, მაქსიმალურად გადაიყვანონ თანამშრომლები მუშაობის დისტანციურ რეჟიმზე და ანალოგიური რეკომენდაციით მიმართეს კერძო სექტორს.