დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, რეგულაციების დაცვა კიდევ წელიწად-ნახევარი ან შესაძლოა, უფრო დიდხანს დაგვჭირდეს. ამის შესახებ მან ვებინარზე ისაუბრა.

"ჩვენ უნდა გავითავისოთ, რომ ომში ვართ დღეს სამყაროსთან, ვინ ვის დაამარცხებს რთულია, აქედან გამომდინარე, ამარცხებს მას, მხოლოდ და მხოლოდ, აცრა და რეგულაციებს დაცვა, რომელიც დაგვჭირდება კიდევ კარგა ხანს, წელიწადი, წელიწად-ნახევარი და მეტი კიდევ, შეიძლება. იმიტომ, რომ ეს ვირუსი ებრძვის სამყაროს, იცვლის თავის გენეტიკურ შენობას, მუტაცია ხდება ხშირი იმიტომ, რომ ადაპტირდეს და უფრო მეტი ადამიანი დააზიანოს, აქედან გამომდინარე, იცავს, მხოლოდ და მხოლოდ, აცრა", — განაცხადა მან.

მისი თქმით, მოწოდებები, რომ სექტემბრიდან ორჯერადად აცრილებისთვის და აუცრელებისთვის, შესაძლოა, სხვადასხვა რეგულაცია დაწესდეს, დისკრიმინაციული არ არის, რადგან რთული ეპიდემიოლოგიური ვითარება რომ თავიდან ავიცილოთ, აცრა აუცილებელია.

"გვაბრალებენ ახლა, რომ ადამიანის უფლებებს ვარღვევთ, როცა ასეთ მოწოდებებს ვაკეთებთ, დისკრიმინაციაა. არ არის ეს არც დისკრიმინაცია და არც ადამიანის უფლებების დარღვევა. მსოფლიოში არის პანდემია, ეპიდემია. თან, ეს არ არის ის ეპიდემია, რომელიც გვინახავს ხოლმე ხშირად. ეს არის ეპიდემია და პანდემია, რომელიც 100 წელიწადში ერთხელ და რომელმაც უკვე შეიწირა ოთხ-ნახევარი მილიონი ადამიანის სიცოცხლე და საქართევლოში 6 649. ეს რომ თავიდან ავიცილოთ, უნდა ავიცრათ", — განაცხადა მან.

NCDC-ის რეკომენდაციაა, რომ სექტემბრიდან სხვადასხვა დაწესებულებაში შესვლა გარკვეული პირობებით გახდეს შესაძლებელი. კერძოდ, საუბარია, რომ მოქალაქეები დაიშვან მხოლოდ იმ შემთხვევაში, თუ არიან მინიმუმ ერთი დოზით აცრილები ან წარადგენენ კორონავირუსის საწინააღმდეგო ტესტის უარყოფით პასუხს. იმ შემთხვევაში კი, თუ ეს რეკომენდაცია ძალაში შევა, ტესტი უფასო აღარ იქნება. თუმცა გამყრელიძის განცხადებით, თუ ტესტირება ფასიანი გახდა, ორჯერადად აცრილებისთვის, შესაძლოა, უფასო იყოს.