საერთაშორისო მედიები ავრცელებენ ინფორმაციას, რომ თალიბები ფიზიკურად უსწორდებიან ადამიანებს, მათ შორის, ქალებსა და ბავშვებს, რომლებიც ქვეყნის დატოვებას ცდილობენ. როგორც The Guardian წერს, ეს თალიბების შექმნილი საგუშაგოების გავლისას ხდება, რაც ძირს უთხრის მათ მიერ გაცემულ პირობას "უსაფრთხო გადასასვლელის" შესახებ იმ ადამიანებისთვის, ვისაც ქაბულის აეროპორტამდე მისვლა სურს.

გამოცემის ინფორმაციით, 18 აგვისტოს ავღანელი თარჯიმანი, რომელიც ავსტრალიელ სამხედროებთან მუშაობდა, ფეხში დაჭრეს მას შემდეგ, რაც მან გამშვები პუნქტი გაიარა საევაკუაციო თვითმფრინავის ბორტზე ასასვლელად.

ფოტო: The Guardian

Fox News-ისა და Los Angeles Times-ის გავრცელებულ ვიდეოკადრებში კი ჩანს, რომ თალიბანის მებრძოლები ფიზიკურად ძალადობენ პირზე, რომელიც მანქანაში ზის. არსებული ინფორმაციით, ის ქვეყნის დატოვებას ცდილობდა.

გარდა ამისა, ბოლო რამდენიმე დღეა მედიაში ვრცელდება ფოტოები, რომლებიც ქაბულის აეროპორტში დაშავებულების მდგომარეობას ასახავს. აეროპორტში სროლის შედეგად რამდენიმე ადამიანიც დაიღუპა.

ფოტო: Marcus Yam/Los Angeles Times

ფოტო: Marcus Yam/Los Angeles Times

აღსანიშნია, რომ "უსაფრთხო გადასვლის" დაპირების პარალელურად, თალიბანმა პირველ პრესკონფერენციაზე მთელი რიგი გარანტიები გასცა, რომ მოწინააღმდეგეებზე "შურისძიებას" არ აპირებენ და მათ "არავინ დაუკაკუნებთ კარზე". თუმცა ადგილზე მყოფი ჟურნალისტები ამბობენ, რომ ქაბულში საპირისპირო სიტუაციაა.

თალიბანმა 15-16 აგვისტოს ავღანეთის დედაქალაქი ქაბულიც აიღო და განაცხადა, რომ "ომი დასრულდა". 15 აგვისტოს, მას შემდეგ, რაც თალიბანი დედაქალაქს მიადგა, ქვეყანა პრეზიდენტმა და მთავრობის რამდენიმე წევრმა დატოვა. მებრძოლები პრეზიდენტის სასახლეში შევიდნენ და ახლა ადმინისტრაციას ისინი აკონტროლებენ. თუმცა, ხელისუფლების რამდენიმე წარმომადგენელი ამ დრომდე ქვეყანაში რჩება. მათ შორის არის ავღანეთის ვიცე-პრეზიდენტი ამრულა სალეჰი, რომელიც მოსახლეობას თალიბანის წინააღმდეგ ბრძოლისკენ მოუწოდებს.

ავღანელების ნაწილი ქვეყნიდან გაქცევას ცდილობს, რის გამოც რამდენიმე დღის განმავლობაში ქაბულის აეროპორტში ქაოსი და დაძაბულობა იყო. არსებული ინფორმაციით, თალიბებმა ცეცხლი გაუხსნეს ადგილობრივებს და დაიღუპა რამდენიმე ადამიანი. თალიბები აცხადებენ, რომ ქვეყნის მართვას შარიათის კანონებით აპირებენ, რაც ნიშნვს, რომ ქალებს შეზღუდული უფლებები ექნებათ.

ქვეყნების უმრავლესობამ ქაბულში საელჩოები დახურა და დიპლომატიური კორპუსის გაყვანას ცდილობს. გამონაკლისი რუსეთი, ჩინეთი და ირანია, რომლებიც ამბობენ, რომ მუშაობას აგრძელებენ.