თეთრი ხმაურის მოძრაობამ ახალი აქცია დააანონსა, რომელზეც აქტივისტები ძირეულ საკანონმდებლო ცვლილებებს მოითხოვენ. ისინი აცხადებენ, რომ ნარკოპოლიტიკის ეროვნული პლატფორმის ფარგლებში, მათი მონაწილეობით მომზადებული კანონპროექტი, ერთადერთი მექანიზმია ქვეყანაში არსებული ნარკოპოლიტიკის შესაცვლელად:

"წარმატებებს მივაღწიეთ, თუმცა ძალადობრივი ნარკოპოლიტიკა ისევ გრძელდება. უსამართლო კანონებით დასჯილი მოქალაქეები დღემდე ელიან საზოგადოებაში სრულფასოვან დაბრუნებას".

თეთრი ხმაურის განცხადებით, აქციის მიზანია შეახსენონ ხელისუფლებას, რომ აღარ მოითმენენ "ძალადობრივ ნარკოპოლიტიკასა" და "ფასადურ ცვლილებებს".

აქტივისტები მიიჩნევენ, რომ:

  • მხოლოდ დეკრიმინალიზაცია დაამთავრებს სისტემურ ძალადობას და რეპრესიას.
  • მხოლოდ დეკრიმინალიზაციას შეუძლია საქართველოს პოლიციას დაუბრუნოს ღირსება.
  • მხოლოდ დეკრიმინალიზაცია გადაიყვანს ნარკოპოლიტიკას ჯანდაცვის მიდგომებზე.

თეთრი ხმაური აცხადებს, რომ ჰუმანური ნარკოპოლიტიკის პირობებში საზოგადოებამ ერთმანეთზე ზრუნვით და არა დასჯით უნდა იცხოვროს.

აქცია კვირას, 23 აპრილს დაანონსდა. მოძრაობა აცხადებს, რომ შეკრების ადგილი პარლამენტში შემავალი პარტიების, საკანონმდებლო და აღმასრულებელი ხელისუფლების ქმედებებზე იქნება დამოკიდებული.