დაავადებათა კონტროლის ეროვნული ცენტრის ხელმძღვანელის მოადგილე მიიჩნევს, რომ გარკვეული პროფესიული ჯგუფებისთვის აცრა სავალდებულო უნდა იყოს. ამის შესახებ პაატა იმნაძემ მედიისთვის გამართულ ვებინარზე განაცხადა.

"ჩემი პირადი აზრია, რომ გარკვეული პროფესიული ჯგუფებისათვის ვაქცინაცია უნდა იყოს სავალდებულო, რა თქმა უნდა, არა ყველასთვის, მაგრამ გარკვეული პროფესიული ჯგუფებისათვის, მაგალითად ჩემი კოლეგებისათვის", — აცხადებს ის.

ამასთან, იმნაძე იმასაც ამბობს, რომ ამ ეტაპზე ვაქცინაციის ტემპით კმაყოფილია და იმედს გამოთქვამს, რომ უფრო გაიზრდება, რადგან აცრის პუნქტებში გატარების შესაძლებლობები მომატებულია.

13 აგვისტოს მონაცემებით, საქართველოში კორონავირუსის 5 359 ახალი შემთხვევა დადასტურდა, გამოჯანმრთელდა 2 726, ხოლო გარდაიცვალა — 42 ადამიანი. რაც შეეხება აცრის მაჩვენებელს, დღეის მდგომარეობით, სულ აცრილია 741 353 ადამიანი, ბოლო დღიური მაჩვენებელი კი არის 25 432.