ქართული ოცნება საკუთარი კვლევის შედეგებს აქვეყნებს, რომლის თანახმად პარტიას 46,2% აქვს მხარდაჭერა, კახა კალაძეს კი — 66,2%. კალაძის რეიტინგი იმ პირობით არის დათვლილი, თუ კანდიდატებად მხოლოდ კალაძე და მელია იქნებიან. ამასთან, კვლევა მხოლოდ თბილისშია ჩატარებული, რაც იმას ნიშნავს, რომ თბილისის განწყობებს ასახავს და მთელი ქვეყნის მასშტაბით განზოგადება შეუძლებელია.

"კვლევა ჩატარდა 2-8 აგვისტოს, პირისპირ ინტერვიუს მეთოდით, გამოიკითხა 3 446 რესპონდენტი, საიდანაც ფავორიტი პარტია დაასახელა 2 728 რესპონდენტმა, ანუ გამოკითხულთა 79,2%-მა. ცდომილების ზღვარი შეადგენს 2.2%-ს. წარმოგიდგენთ გამოკითხვის შეწონილ მონაცემებს", — განაცხადა შალვა პაპუაშვილმა. თუმცა, მას გამოკითხულტა ასაკის შესახებ არაფერი უთქვამს. ამასთან, კვლევის შედეგებზე ოფიციალური დოკუმენტი წერილობითი სახით არ არსებობს.

თბილისის მერობის კანდიდატები მხოლოდ კახა კალაძე და ნიკა მელია რომ იყვნენ, ხმები ასე გადანაწილდება:

  • კახა კალაძე — 66,2%;
  • ნიკა მელია — 33,8%.

პარტიული რეიტინგების შეწონილი მონაცემები:

  • ქართული ოცნება — 46,3%;
  • ნაციონალური მოძრაობა — 23,3%;
  • გირჩი — მეტი თავისუფლება — 5,3%;
  • საქართველოსთვის — 5,2%;
  • მოქალაქეები — 3,3%;
  • სტრატეგია აღმაშენებელი — 2, 3%;
  • ლელო — 2,3%;
  • პატრიოტთა ალიანსი — 2,1%;
  • ევროპული საქართველო — 1,4%;
  • გირჩი — 1,2%;
  • ლეიბორისტული პარტია — 0,9%;
  • ერთიანი საქართველო — 0,8%;
  • სხვა პარტიები — 5,6%.

პაპუაშვილის თქმით, ეს კვლევები აჩვენებს, რომ ქართული ოცნების რეიტინგი თბილისის მასშტაბით, 2020 წლის პარლამენტის არჩევნების შედეგებთან შედარებით, გაზრდილია და მმართველი პარტია არჩევნებში დამაჯერებლად გაიმარჯვებს.

როგორც პაპუაშვილმა განაცხადა, ქართულ ოცნებაში 2020 წლიდან შექმნილია სოციოლოგიური კვლევების ჯგუფი, რომელიც პროფესიონალური მეთოდოლოგიის შესაბამისად, თბილისსა და სხვა ქალაქებში ატარებს კვლევებს და ადგენს პოლიტიკური პარტიებისა და კანდიდატების რეიტინგებს. მისივე თქმით, 2020 წლის მონაცემებმა დაადასტურა, რომ ამ კვლევებს შეუძლია არჩევნების შედეგების პროგნოზირება.