თალიბანმა ავღანეთის სიდიდით მეორე ქალაქი, ყანდაარი აიღო. ინფორმაციას ამის შესახებ Reuters ოფიციალური პირებზე დაყრდნობით ავრცელებს.

ყანდაარი, რომელიც სამი ძირითადი მაგისტრალის შეერთების ადგილას მდებარეობს, სტრატეგიულად მნიშვნელოვანი ქალაქია. ის ადრე ამერიკის სამხედრო ოპერაციების მთავარი კერა იყო. მედიების განცხადებით, მისი აღება თალიბანისთვის, ჯერჯერობით, ყველაზე მნიშვნელოვანი მოგებაა.

12 აგვისტოს თალიბანმა აიღო ქვეყნის სიდიდით მესამე ქალაქი — ჰერათიც, რის შემდეგაც აშშ-მ მოუწოდა ამერიკელებს, დაუყოვნებლივ დატოვონ ავღანეთი და დასახმარებლად 3 000 სამხედროს გზავნის, რათა უზრუნველყონ საელჩოს თანამშრომელთა უსაფრთხო დაბრუნება.

გარდა ამისა, მედიის ცნობით, ბრიტანეთიც აპირებს, რომ დაახლოებით, 600 სამხედრო გაგზავნოს, რათა დაეხმაროს მოქალაქეებს ქვეყნის დატოვებაში. მათივე განცხადებით, სხვა საელჩოებმა და დამხმარე ჯგუფებმაც განაცხადეს, რომ აპირებენ მათი ხალხის გაყვანას.

ავთანეთში ძალადობა მას შემდეგ გაიზარდა, რაც აშშ-მა და სხვა საერთაშორისო ძალებმა 20-წლიანი სამხედრო ოპერაციების შემდეგ, 1 მაისიდან ქვეყნიდან ჯარების გაყვანა დაიწყეს. აშშ-ის პრეზიდენტის გადაწყვეტილებით, ამერიკის მისია ავღანეთში დაგეგმილზე ადრე, 31 აგვისტოს, დასრულდება. აშშ-მ მთავარი სტრატეგიული წერტილი — ბაგრამის ავიაბაზა, უკვე დატოვა. ავღანეთში ამერიკელ სამხედროთა მხოლოდ მცირე ჯგუფი რჩება და ისინი საელჩოს დაიცავენ. ივნისის ბოლოს The Wall Street Journal-მა აშშ-ის დაზვერვის სამსახურთან დაახლოებული პირების ინფორმაციაზე დაყრდნობით გაავრცელა, რომ დაზვერვის სამსახურის დასკვნით, რომელიც ჯერ ოფიციალურად არ გამოქვეყნებულა, აშშ-ის ძალების მიერ ავღანეთის დატოვებიდან 6 თვეში შესაძლოა, ქაბულის მთავრობა დაეცეს.

გაიგეთ მეტი: