მოძრაობა თავისუფლებისთვის-ევროპული საქართველოს წევრი სერგი კაპანაძე ბათუმში მომხდარ მოვლენებთან დაკავშირებით განცხადებას ავრცელებს.

მისი თქმით, ეს არის იმ პოლიტიკის შედეგი, რომელსაც ხელისუფლება ბოლო წლების განმავლობაში ატარებს:

"ხელისუფლების პოლიტიკის გამო შემცირდა სახელმწიფო ინსტიტუტების მიმართ პატივისცემა და პატრულის მიმართ ნდობა. ხელისუფლება სხვადასხვა ჯგუფებს კონკრეტული მიზნების მისაღწევად იყენებს და ჩვენ გუშინ ვნახეთ, რომ ერთ-ერთი აქტიური მონაწილეთა ჯგუფი ამ ბუნტში იყვნენ ის ადამიანები, რომლებიც რამდენიმე წლის წინ საკონსტიტუციო სასამართლოს მოსამართლეების ფანჯრებთან ატარებდნენ აქციებს და ჰქონდათ მათზე ზეწოლის მცდელობა".

კაპანაძე მიიჩნევს, რომ ხელისუფლების გუშინდელი რეაგირება დაგვიანებული იყო:

"ჩვენ გუშინ ვნახეთ ძალიან დაგვიანებული რეაქცია როგორც ადგილობრივი, ისე ცენტრალური ხელისუფლების მხრიდან. საათების განმავლობაში უკონტროლო პროცესები მიდიოდა ისე, რომ სათანადო რეაგირება არ ყოფილა. იმედი გვაქვს, მოხდება ისეთი ტიპის რეაგირება, რათა აღარ განმეორდეს მსგავსი არეულობა. ასევე ძალიან მნიშვნელოვანია, რომ ის ვანდალიზმი, რომელიც გუშინ განხორციელდა, როგორც პოლიციის მანქანების, ისე ქალქის ინფრასტრუქტურის მიმართ იყოს გამოძიებული და ჩამდენი პირები იყვნენ დასჯილი. ერთია სამართლიანი პროტესტი, რომელსაც გამოხატავდა იქ მყოფი რამდენიმე ათეული ადამიანი კონკრეტული ფაქტების გამო და მეორე ვანდალობა, რომელიც არ შეიძლება, რომ არ იყოს გამოვლენილი და დასჯილი".

კაპანაძე მიიჩნევს, რომ დაუშვებელია სიტუაციის დრამატიზება და პოლიტიზირება:

"არავის ინტერესში არ უნდა იყოს ბათუმში ურთიერთობების კიდევ უფრო დაძაბვა სხვადასხვა საზოგადოებრივ ჯგუფებს შორის. გუშინ რაც მოხდა იყო უპრეცენდენტო შემთხვევა ბოლო წლების საქართველოს ისტორიაში და იმედი გვაქვს, რომ მსაგვსი რამ აღარასოდეს განმეორდება".

კაპანაძე დასძენს, რომ ბათუმში განვითარებული პროცესების პოლიტიკური ოპონენტებისთვის გადაბრალება "ხელისუფლების ცდუნებაა":

"ვინც დამნაშავეა დაისაჯოს, როგორც ერთი, ისე მეორე მხრიდან იმიტომ, რომ გუშინ არ იკვეთებოდა დანაშაული მხოლოდ ერთი მხრიდან".

შინაგან საქმეთა მინისტრის თქმით, ბათუმში სიტუაცია კონტროლის ექვემდებარება და დაკავებულია 40-მდე პირი.