მერაბ ღოღობერიძე, რომელიც საკუთარ თავს უფლებადამცველს უწოდებს, რუსთავი 2-თან საუბრისას აცხადებს, რომ ის იყო ბათუმში, აჭარის პოლიციის ხელმძღვანელის კახა ბუხრაძის წინააღმდეგ გამართული აქციების ორგანიზატორია, თუმცა დასძენს, რომ განვითარებულ მოვლენებში პასუხისმგებლობა ეკისრება ხელისუფლებას და არა მას:

"ის რაც მოხდა უკვე მათი დანაშაულია და ძალიან აგრესიულები იყვნენ, მაგრამ მათ თვალწინ მოხდა ეს დაკავება, ადამიანების ცემა და ეს იყო პიკი. ამ შემთხვევაში პასუხისმგებლობა უნდა იგრძნოს ხელისუფლებამ, რადგან უნდა მოეხდინა დროული რეაგირება".

ღოღობერიძე აცხადებს, რომ ის დაკითხვაზე ჯერ არ დაუბარებიათ, თუმცა ამბობს, რომ მზადაა, კითხვებზე პასუხი გასცეს.

მერაბ ღოღობერიძემ კახა ბუხრაძის გასათავისუფლებლად პირველი აქცია თანამოაზრეებთან ერთად 9 მარტს გამართა. მისი თქმით, მან გადმოცემით გაიგო, რომ აჭარის პოლიციის უფროსმა, რომელიც შს მინისტრმა გორიდან გადმოიყვანა, აჭარლებს თათრები უწოდა.

ღოღობერიძეს ბათუმში საკუთარი არასამთავრობო ორგანიზაცია აქვს და 2012 წლიდან ოპოზიციის წინააღმდეგ აქციებს აწყობს. 2016 წლის ზაფხულში, მან ნაციონალური მოძრაობის წევრს ლევან ვარშალომიძეს სიტყვით გამოსვლისას ფეხსაცმელი ესროლა.

გუშინდელი არეულობის შემდეგ ბათუმში 40-მდე ადამიანია დაკავებული.