დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, თუ მათი რეკომენდაცია დაწესებულებებში კორონავირუსის ტესტის უარყოფითი პასუხით შევლის შესახებ ძალაში შევა, ტესტი უფასო აღარ იქნება.

"დღეს 7%-მდე ვართ დახლოებით მოსახლეობის მოცვით, სანამ არ ავცილდებით 10%-ს მანამდე დავუშვებთ ჯერჯერობით, რომ ერთჯერ აცრილი ადამიანიც დაშვებული იყვეს ასეთ დაწესებულებაში ყოველგვარი სხვა დამატებითი ღონისძიების გარეშე. ან თუ ის აცრილი არ არის, მაშინ მას ბოლო 72 საათში უნდა ჰქონდეს გაკეთებული და უარყოფითი PCR ტესტი ან ბოლო 24 საათში სწრაფი ანტიგენ ტესტი. ეს საკითხი ჩვენ დავაყენეთ დღეს, ალბათ, საბჭო ამაზე იმსჯელებს, ჩვენი წინადადება იყო რომ ხალხი მოემზადოს.

ხაზი მინდა გავუსვა, რომ ეს 24-საათიანი და 72-საათიანი PCR ან ანტიგენი აღარ იქნება სახელმწიფოს ხარჯზე. სახელმწიფო მოსახლეობას აძლევს საშუალებას, რომ ისინი უფასოდ აიცრან, მაგრამ თუ ჩვენ არ ვიცრებით და გვინდა რესტორანში წასვლა, გვინდა ამ დაწესებულებებში სტუმრობა და წასვლა, მაშინ კეთილი ინებეთ უკვე და თქვენი ხარჯით ან თქვენი დამსაქმებლის ხარჯით გადაიხადეთ შესაბამისი თანხა ტესტირებისთვის", — განაცხადა მან.

საკოორდინაციო საბჭოს წარმომადგენლის, გიორგი ღიბრაძის განცხადებით, დაავადებათა კონტროლის ეროვნული ცენტრის ხელმძღვანელის რეკომენდაციაა, რომ სექტემბრიდან სხვადასხვა დაწესებულებაში შესვლა გარკვეული პირობებით გახდეს შესაძლებელი. კერძოდ, საუბარია, რომ მოქალაქეები დაიშვან მხოლოდ იმ შემთხვევაში, თუ არიან მინიმუმ ერთი დოზით აცრილები ან წარადგენენ კორონავირუსის საწინააღმდეგო ტესტის უარყოფით პასუხს.

გაიგეთ მეტი: