NDI-ის კვლევის მიხედვით, მოსახლეობის უმრავლესობამ არ იცის ან არ ასახელებს იმ პარტიას, რომელიც მის შეხედულებებთან ყველაზე ახლოს დგას. მხოლოდ 30% ასახელებს კონკრეტულ პარტიას და აქედან ქართულ ოცნებას — 18%, ერთიან ნაციონალურ მოძრაობას — 6% და ყველა დანარჩენის მაჩვენებელი ერთად არის 6%. ასეთია NDI-ის დაკვეთით ჩატარებული საზოგადოებრივი განწყობების კვლევის შედეგი.

კითხვაზე — რომელი პარტია დგას თქვენს შეხედულებებთან ყველაზე ახლოს, პასუხები ასე გადანაწილდა:

  • არც ერთი — 51%;
  • ქართული ოცნება — 18%;
  • ენმ — 6%;
  • სხვა პარტიები (ყველა ერთად) — 6%;
  • არ ვიცი — 10%;
  • უარი პასუხზე — 9%.

მათი არჩევანი კი, ვინც არჩევნებში მონაწილეონას სავარაუდოდ მიიღებს (61%), ასეთია:

  • არც ერთი — 45%;
  • ქართული ოცნება — 24%;
  • ენმ — 7%;
  • სხვა პარტიები (ყველა ერთად) — 7%;
  • არ ვიცი — 9%;
  • უარი პასუხზე — 9%.

"პარტიების მხარდაჭერის ინდივიდუალური მაჩვენებლები იმდენად დაბალია, რომ არჩევნების შედეგების გამოსაცნობად ვერ გამოდგება. ამ გამოკითხვისა და არჩევნების შედეგები მნიშვნელოვნად განსხვავებული იქნება, რადგან არჩევნების ბედი გადაუწყვეტელი ამომრჩევლის ქცევაზე იქნება დამოკიდებული", — ნათქვამია კვლევის შენიშვნაში.

კვლევა საზოგადოების განწყობა საქართველოში NDI-ის დაკვეთით CRRC საქართველოს მიერ ჩატარდა. კვლევა დიდი ბრიტანეთის მთავრობის UK aid-ის ფინანსური ხელშეწყობით ხორციელდება,

აღნიშნული კვლევა 13-25 ივლისის პერიოდში საქართველოს მასშტაბით 2 016 სატელეფონო ინტერვიუს წარმომადგენლობითი შერჩევის საფუძველზე, ქვეყნის სრულწლოვან მოსახლეობას შორის ჩატარდა (ოკუპირებული ტერიტორიების გამოკლებით). გამოკითხვის საშუალო ცდომილების ზღვარი არის +/- 1.3%. ამასთან, ცდომილების ზღვარი კითხვების მიხედვით იცვლება. რესპონდენტები შემთხვევითი შერჩევის გზით — ნომერზე დარეკვის მეთოდით, შეირჩნენ. ინტერვიუები ჩატარდა ქართულ, აზერბაიჯანულ, სომხურ და რუსულ ენებზე.