შინაგან საქმეთა სამინისტროს პრესსამსახურის უფროსი, თეა პერტაია ფეისბუკის საშუალებით ინფორმაციას ავრცელებს, რომ მინისტრი გიორგი მღებრიშვილი აჭარაში მიემგზავრება. პერტაიას ცნობით, დაშავებულები არიან პოლიციელებიც.

აჭარის პოლიციის მთავარ სამმართველოსთან უკვე რამდენიმე საათია საპროტესტო აქცია მიმდინარეობს. აქციის მონაწილეები აჭარის პოლიციის უფროსის, კახა ბუხრაძის გადადგომასა და დაკავებულების გათავისუფლებას ითხოვენ. ყველაფერი იმით დაიწყო, რომ 11 მარტს პატრულმა მოძრაობის შეფერხებისთვის მოქალაქე დააჯარიმა, რასაც სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა. აქციის მონაწილეები აცხადებენ, რომ სამართალდამცავებმა დაკავებულებს სცემეს, თუმცა, ომბუდსმენის წარმომადგენელმა, რომელმაც დაკავებულები იზოლატორში მოინახულა, თქვა, რომ ისინი ამ ფაქტს არ ადასტურებენ.

ბათუმელების ინფორმაციით, სამართალდამცავებმა მოქალაქეთა დასაშლელად გამოიყენეს ცრემლსადენი გაზი, თუმცა, აქციის მონაწილეებმა პოლიციის მიმდებარედ შეკრება ისევ დაიწყეს.