ბათუმელების ინფორმაციით, ბათუმში მიმდინარე აქციაზე, აჭარის პოლიციის დეპარტამენტის შენობის წინ პოლიციამ ცრემლსადენი გაზი გამოიყენა მას შემდეგ, რაც მოქალაქეებმა პოლიციის შენობასთან მყოფი პოლიციის სპეციალური რაზმის მისამართით ქვები ისროლეს.

იმავე გამოცემის ცნობით, ცრემლსადენი გაზის გაშვების შემდეგ, აქციის მონაწილეები რამდენიმე წუთით დაიშალნენ, თუმცა აქცია მალევე განახლდა.

ბათუმში, პოლიციის სამმართველოს შენობასთან მიმდინარე აქციაზე აჭარის პოლიციის უფროსის გადადგომასა და დაკავებულების გათავისუფლებას ითხოვენ. ყველაფერი იმით დაიწყო, რომ 11 მარტს პატრულმა მოძრაობის შეფერხებისთვის მოქალაქე დააჯარიმა, რასაც სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა.