ხანდახან ჩვენი საყვარელი მსახიობები ცხოვრებაშიც ისეთივე საოცრებები არიან, როგორც ეკრანებზე. ასეთი აღმოჩნდა ჯული ბოუენიც.

ბოუენი, რომელსაც მაყურებლების დიდი ნაწილი ერთ-ერთი ყველაზე ცნობილი სიტკომიდან Modern Family (თანამედროვე ოჯახი) კლერ დანფის როლით იცნობს, იუტას შტატში ლაშქრობისას გონებადაკარგულ ქალს დაეხმარა.

მინი ჯონი თავის ოჯახთან ერთად ატარებდა თავისუფალ დროს და ქვის ბუნებრივი თაღების ეროვნულ პარკში ფეხით სეირნობდა, თუმცა რაღაც მომენტში თავი შეუძლოდ იგრძნო, რის გამოც თავის ქმარ-შვილს სთხოვა, სვლა მის გარეშე გაეგრძელებინათ, თვითონ კი ცოტას დაისვენებდა და მერე წამოეწეოდა მათ. ამის შემდეგ ბოლო, რაც მას ახსოვს, ისაა, რომ ქვაზე ჩამოჯდა, რაღაც დროის შემდეგ კი ნაცნობმა ხმამ გამოაფხიზლა.

აღმოჩნდა, რომ მინი ჯონს გული წაუვიდა და ცხვირი ქვაზე დაარტყა. სწორედ ამ მდგომარეობაში გადააწყდნენ მას ჯული ბოუენი და მისი და, სახელად ენი, რომელიც ექიმია. დები მას დაეხმარნენ, რომ თავი უკეთ ეგრძნო, თუმცა თავად მინი ჯონმა ვერაფრით გაიხსენა, თუ საიდან ეცნობოდა ჯული ბოუენი. "ახლახან დავარტყი თავი ქვას", — ნახევრად ხუმრობით ასე გაამართლა თავისი დაბნეულობა, თუმცა დებმა მას მაშინვე უხსენეს თანამედროვე ოჯახი და ყველაფერი ცხადი გახდა.

ამ ისტორიის სრული დეტალები თავად მოჰყვა ფეისბუქზე გამოქვეყნებულ პოსტში, რომელსაც იმავე დღეს გადაღებული ფოტოებიც თან დაურთო:

აღმოჩნდა, რომ მინი ჯონს შაქრის დაბალი დონისა და დეჰიდრატაციის გამო წაუვიდა გული: ის დიაბეტიანია და დიდი ხნის განმავლობაში იყო უჭმელი. საბედნიეროდ, ყველაფერი კარგად დასრულდა, თავად კი გულკეთილი დების დახმარებას "ღვთის საჩუქარს" უწოდებს.