მოულოდნელად ტიტანიკის წყევლა ისევ ამოქმედდა, ოღონდ არა სადღაც ატლანტის ოკეანის ჩრდილოეთით, არამედ ამერიკის სამხრეთით, ტენესის შტატში.

პატარა ქალაქ პიჯენ-ფორჯში მდებარე ტიტანიკის მუზეუმში "აისბერგი" ჩამოიშალა და სამი ადამიანი დაშავდა. The Guardian-ის ცნობით, სამივე დაშავებული საავადმყოფოში გადაიყვანეს, მუზეუმმა კი ერთი დღით შეწყვიტა ფუნქციონირება. მეორე დღეს ის ისევ გაიხსნა, ოღონდ აისბერგი ადგილზე აღარ იყო — მინიმუმ ოთხი კვირა იქნება საჭირო, რომ აისბერგის ასლი ხელახლა გააკეთონ.

როგორც ამ დაწესებულების წარმომადგენლები აცხადებენ, ეს ტიტანიკის თემატიკით მსოფლიოში ერთ-ერთი ყველაზე დიდი მუზეუმია, რომელიც მაქსიმალურად ავთენტურად ასახავს 1912 წელს მომხდარი ტრაგედიის მოვლენებს: იქ 400-მდე არტეფაქტია რეალური გემიდან თუ იმ რეისის მგზავრების პირადი ნივთებიდან.

და რა უნდოდა აისბერგს მუზეუმში? მუზეუმის მესვეურებს ასევე აქვთ პრეტენზია, რომ ყველაფერი რეალობასთან მაქსიმალურად მიახლოებული იყოს, ამიტომ 4,6 x 8,5 მეტრის ყინულის კედელიც იყო იქ განთავსებული, რათა სტუმრები ხელით შეხებოდნენ მას და აისბერგთან ტიტანიკის შეჯახება უკეთ წარმოედგინათ.

პიჯენ-ფორჯში ტიტანიკის მუზეუმი.

ფოტო: Titanic Museum

ადგილობრივმა პოლიციამ აღნიშნული შემთხვევა გამოიძია და განაცხადა, რომ დიდი ალბათობით, ეს უბედური შემთხვევა იყო და არა — მიზანმიმართული დანაშაული. თავად მუზეუმიც ცდილობს, რომ შესაძლო მიზეზები გამოიკვლიოს და მომავალში თავიდან აირიდოს მსგავსი ინციდენტი.