ოკუპანტი ქვეყნის პრეზიდენტმა, ვლადიმერ პუტინმა დე ფაქტო სამხრეთ ოსეთსა და რუსეთს შორის ორმაგი მოქალაქეობა დაამტკიცა. ამ ბრძანებით პუტინმა თავისივე ოკუპირებული და "აღიარებული რესპუბლიკის" მოქალაქეებს უფლება მისცა ისე მიიღონ რუსეთის მოქალაქეობა, რომ უარი არ თქვან ოსურზე.

ბრძანება რუსეთის ხელისუფლების ოფიციალურ ვებგვერდზე გამოქვეყნდა. მასში ვკითხულობთ, რომ რუსეთის შინაგან საქმეთა სამინისტროს უფლება აქვს დოკუმენტში ისეთი ცვლილება შეიტანოს, რომელსაც "პრინციპული მნიშვნელობა" არ აქვს.

ოკუპირებულ რეგიონში მცხოვრებლებს რუსეთის მოქალაქეობის მიღება შეუძლიათ იმ შემთხვევაში თუ 2008 წლის, 26 აგვისტოსთვის მათ ჰქონდათ ე.წ. სამხრეთ ოსეთის მოქალაქეობა. ეს სწორედ ის თარიღია, როცა რუსეთმა საქართველოს ოკუპირებული რეგიონი რესპუბლიკად აღიარა.

დადგენილების მიხედვით, ე.წ. ორმაგი მოქალაქეობის მქონე პირები სარგებლობენ სოციალური სერვისებით, განათლებითა და სამედიცინო მომსახურებით იმ მხარის კანონის შესაბამისად, სადაც მუდმივად ცხოვრობენ.

შეთანხმება ძალაში შევა რატიფიცირებისა და რატიფიცირებული დოკუმენტების გაცვლის შემდეგ. მისი მოქმედების ვადა 5-წლიანია, თუმცა ავტომატურად გრძელდება მომდევნო 5-წლიანი პერიოდებით, თუ ერთი მხარე ვადის ამოწურვამდე 6 თვით ადრე არ აცნობებს მეორეს შეწყვეტის შესახებ. რუსული მედიის განმარტებით, შეთანხმების ანულირება არ გულისხმობს იმას, რომ ე.წ. ორმაგი მოქალაქეობა გაუუქმდებათ მათ, ვისაც იმ დროისთვის აქვთ აღებული.

როგორც რუსული სახელისუფლებო გამოცემა TASS წერს, რუსული კანონმდებლობის მიხედვით, ორმაგი მოქალაქეობის მქონე პირებს ქვეყანა განიხილავს მხოლოდ თავის მოქალაქეებად, გარდა იმ შემთხვევისა, რომელიც რეგულირდება საერთაშორისო შეთანხმებებით და ფედერალური კანონებით.

რუსეთი საქართველოს ორი რეგიონი აქვს ოკუპირებული. ბოლო რამდენიმე წელია ცხინვალისა და აფხაზეთში ეფექტური კონტროლის განმახორციელებლად სწორედ რუსეთი მიიჩნევა. ოკუპანტი ქვეყანა არ ასრულებს საერთაშორისო შეთანხმებებით ნაკისრ ვალდებულებებს.

ვლადიმერ პუტინის მხარდამჭერი ე.წ. პრეზიდენტები მისი პოლიტიკის მიმდევრები არიან. საოკუპაციო რეჟიმი წლების განმავლობაში იტაცებს, უკანონოდ ატყვევებს, აწამებს და კლავს საქართველოს მოქალაქეებს. რეგიონში არსებულ ჰუმანიტარულ კრიზისში ისინი საქართველოს ხელისუფლებას ადანაშაულებენ.