ერთიანი ნაციონალური მოძრაობა კორცხელში, საარჩევნო პროცესის დროს მომხდარი ინციდენტის განსახილხველად დიპლომატიური კორპუსის წარმომადგენლებს ხვდება. შეხვედრაზე უყურებენ იმ ვიდეოს, რომელზეც კორცხელში ძალადობის ფაქტებია აღწერილი.

ენმ-ს საზოგადოებასთან ურთიერთობის მდივნის, ზურაბ ჭიაბერაშვილის განმარტებით, კორცხელში მომხდარი ინციდენტის ორგანიზატორი თავად ხელისუფლებაა, ოქტომბრის არჩევნების პერიოდში კი ძალადობა უფრო დიდ მასშტაბებს მიაღწევს:

"დიპლომატიური კორპუსი შეშფოთებულია იმით, რომ ეს ძალადობა არ უნდა გავრცელდეს, უნდა აღიკვეთოს და რაც ყველაზე მთავარია, დამნაშავეები უნდა დაისაჯონ. ის პირები, რომლებიც იდენტიფიცირებულები არიან კორცხელში, უკვე ემზადებოდნენ გარდაბნის არჩევნებზევე ანალოგიური ქმედებისათვის".

22 მაისს, ზუგდიდში, კორცხელის საარჩევნო უბანზე, სადაც შუალედური ადგილობრივი თვითმმართველობის არჩევნები მიმდინარეობდა, ნაციონალური მოძრაობის წევრებს, მათ შორის გიგა ბოკერიასა და ნიკა მელიას, ფიზიკური შეურაცხყოფა მიაყენეს.