დღეს, 28 ივლისს საქართველომ ტოკიოს ოლიმპიადაზე პირველი ოქროს მედალი მიიღო. გამარჯვება ქვეყანას 21 წლის ძიუდოისტმა, ლაშა ბექაურმა მოუტანა, რომლისთვისაც ეს ასევე პირველი ოქროს მედალია. ამ ტრიუმფისთვის ბექაური საქართველოსგან მილიონ ლარს მიიღებს.

ბექაურმა მადლობა გადაუხადა საკუთარ ექიმს, ზურაბ კახაბრიშვილსაც, რომლის ემოციური ფოტოც დღეს ყველამ იხილა. სპორტსმენმა 1 თვის წინ მხარის ტრავმა მიიღო და არ იცოდა, შეძლებდა თუ არა ოლიმპიადაში მონაწილეობას.

"ზურაბ კახაბრიშვილი მსოფლიოში საუკეთესო ექიმია, რადგანაც როცა ერთი თვის წინ ბუდაპეშტში მხარი დავიზიანე, ძალიან გვეშინოდა, რომ ტოკიოს ოლიმპიადაში ვერ ჩავერთვებოდი. მისი წყალობით, დღეს თავს საუცხოოდ ვგრძნობდი და შევძელი, რომ ძიუდოში ჩემი შესაძლებლობები მეჩვენებინა. ახლა კი, ოლიმპიური ჩემპიონიც ვარ, ცხოვრება მშვენიერია!"

ქართველი ჩემპიონის ამ განცხადებას ძიუდოს საერთაშორისო ფედერაცია (IJF) ავრცელებს.

ქართველმა ძიუდოისტმა, რომელიც კაცების 90კგ წონით კატეგორიაში გამოდიოდა, ფინალში გერმანელი ედუარდ ტრიპელი დაამარცხა. ამ წონით კატეგორიაში 33 ქვეყნის 33 სპორტსმენი იბრძოდა გამარჯვებისთვის.

"ახლა წარმომიდგენია, ჩემი ხალხი როგორი გახარებულია. ძალიან ბედნიერი ვარ. მინდა, დიდი მადლობა გადავუხადო ჩემს ყველა გულშემატკივარს. მსურს, ეს გამარჯვება მთელ საქართველოს მივულოცო".

"გავხდი ოლიმპიური ჩემპიონი და ავიხდინე დიდი ოცნება. ძალიან მიყვარხართ — მთელი საქართველო. მადლობა ჩემს არხილოსკალოს, ჩემს ქედებს და გუდამაყარს. მიყვარხართ", — თქვა მან.

ნახევარფინალში ლაშა ბექაურმა რუსი მეტოქე, მიხაილ იგოლნიკოვი დაამარცხა, სწორედ მაშინ გადაიღეს ექიმის ემოციური ფოტოც.

2 წლის წინ ლაშა ბექაურმა პოლიციელები ძალადობაში დაადანაშაულა. როგორც ის მაშინ ყვებოდა, სპორტსმენი სამართალდამცავებმა ძალის გამოყენებით წაიყვანეს მანქანით.

"შენ არ იცი, როგორ უნდა გველაპარაკოო, შენ კუნთები გერჩის, როგორც გეტყობაო და ეგრევე გინება დამიწყეს. მეც, რა თქმა უნდა, წინააღმდეგობას ვუწევდი არ მეგონა ესე თუ მოიქცეოდნენ... რას ვხედავ, დამიწყეს გინება და დარტყმები. მეც, რა თქმა უნდა, წინააღმდეგობა გავუწიე და მეც ვაგინებდი (ამათ თავს არ დავუხრიდი სულ რო მოვმკვდარიყავი). ორი მიჭერდა, თან მირტყამდნენ. მერე რომ ვეღარ მერეოდნენ, მესამე ჩაისვეს და გააგრძელეს", — წერდა სპორტსმენი.

19 წლის ბექაურის იმდროინდელი ნაამბობით, ის ვარჯიშიდან შინ ბრუნდებოდა, როდესაც დააკავეს, ხოლო განყოფილებასთან მიყვანის შემდეგ ძალადობაში სხვა პოლიციელებიც ჩაერთვნენ:

"უნდოდათ გავმტყდარიყავი. ერთი სატანისსახიანი შემოვარდა მერე, ვინაა ესო, რა პანიკებშიაო... მაგინებდა ისიც, ტატამზე ხო არ ჰგონია თავიო. იარაღი ამოიღო, კუნთებით თუ ვერა, აი, იარაღი აქ მაქვსო... დამთავრდა შენი კარიერაო მიმეორებდა".

ლაშა ბექაური ამბობდა, რომ ძალადობასთან ერთად მისთვის ნარკოტიკული საშუალების ჩადებაც განიხილებოდა, პარალელურად კი მასზე ფსიქოლოგიურადაც ძალადობდნენ.