ქართველი ძიუდოისტი და მსოფლიო ჩემპიონი, 19 წლის ლაშა ბექაური ქართულ პოლიციას ძალადობაში ადანაშაულებს. როგორც ის Facebook-ზე წერს [პოსტი აღარ იძებნება], მასზე პოლიციის თანამშრომლებმა გუშინ, 7 დეკემბერს იძალადეს.

მისი მონაყოლის მიხედვით, ვარჯიშის დასრულების შემდეგ ის თბილისში, მარჯანიშვილის ქუჩაზე პოლიციის თანამშრომლებმა გააჩერეს და პირადობის დამადასტურებელი დოკუმენტი მოსთხოვეს, თუმცა სამართალდამცავები "ძმაოთი" მიმართვამ გააღიზიანა.

"[დოკუმენტები] არ მაქვს ძმაო მეთქი და ისევ ნაგლად მომმართა, ძმაოთი რატო მომმართავო. მეთქი, აბა, როგორ მოგმართო, ჯიგრულად ძმაოთი მოგმართავ, ხო მეთქი. შენ ასეთი ლაპარაკი ვინ გასწავლაო, შე უზრდელოო", — ყვება მსოფლიო ჩემპიონი.

მისი თქმით, ამ შელაპარაკების შემდეგ ძალის გამოყენებით წაიყვანეს მანქანით.

"შენ არ იცი, როგორ უნდა გველაპარაკოო, შენ კუნთები გერჩის, როგორც გეტყობაო და ეგრევე გინება დამიწყეს. მეც, რა თქმა უნდა, წინააღმდეგობას ვუწევდი არ მეგონა ესე თუ მოიქცეოდნენ... რას ვხედავ, დამიწყეს გინება და დარტყმები. მეც, რა თქმა უნდა, წინააღმდეგობა გავუწიე და მეც ვაგინებდი (ამათ თავს არ დავუხრიდი სულ რო მოვმკვდარიყავი). ორი მიჭერდა, თან მირტყამდნენ. მერე რომ ვეღარ მერეოდნენ, მესამე ჩაისვეს და გააგრძელეს", — ამბობს სპორტსმენი.

ბექაური ყვება, რომ პოლიციის ერთ-ერთ განყოფილებასთან მიყვანის შემდეგ ძალადობაში სხვა პოლიციელებიც ჩაერთვნენ:

"უნდოდათ გავმტყდარიყავი. ერთი სატანისსახიანი შემოვარდა მერე, ვინაა ესო, რა პანიკებშიაო... მაგინებდა ისიც, ტატამზე ხო არ ჰგონია თავიო. იარაღი ამოიღო, კუნთებით თუ ვერა, აი, იარაღი აქ მაქვსო... დამთავრდა შენი კარირაო მიმეორებდა".

ბექაური ამბობს, რომ ძალადობასთან ერთად მისთვის ნარკოტიკული საშუალების ჩადებაც განიხილებოდა, პარალელურად კი მასზე ფსიქოლოგიურადაც ძალადობდნენ.

"მერე დავუმუღამე, ვეღარ მაღიზიანებდნენ წყნარად მელაპარაკებოდნენ, რა მიღწევები გაქვსო. მე ხმას არ ვცემდი. მერე ერთი "ღადაობდა" "დუმილის უფლებით" სარგებლობსო", — ასე იხსენებს 19 წლის მსოფლიო ჩემპიონი პოლიციასთან ურთიერთობას.

On.ge ამ საკითხზე საგამოძიებო უწყებებიდან კომენტარს ელოდება.