"ორი ცალი გაქვთ და რად გინდა?" — ასე უპასუხა კულტურის მინისტრმა, თეა წულუკიანმა მთავარი არხის ჟურნალისტის კითხვას, როდის დააბრუნებს ტელევიზიის კუთვნილ მიკროფონს.

კულტურის მინისტრმა არ უპასუხა კითხვას, სად აქვს მთავარი არხის მიკროფონი. მან, ასევე, ჟურნალისტს ირონიულად მიმართა.

"ვაიმე, რა მკაცრი ხარ?.... უნიჭოდ მბაძავთ", — უთხრა წულუკიანმა მედიის წარმომადგენელს, როცა ჟურნალისტმა მას ჰკითხა, როდის დაისჯებიან 5-6 ივლისის ჰომოფობიური და ძალადობრივი აქციის ორგანიზატორები.

"გამოძიების დასრულების შემდეგ დაისჯებიან. [როდის დასრულდება გამოძიება] ეს მე არ ვიცი. ჩემ კომპეტენციებში არ შედის", — განაცხადა კულტურის მინისტრმა.


ვიცე-პრემიერი და კულტურის მინისტრი, თეა წულუკიანი მთავარი არხის ჟურნალისტს მიკროფონს ამ დრომდე არ უბრუნებს. მან ემა გოგოხიას მიკროფონი სენაკის თეატრში წაართვა და შეუარცხყოფა მიაყენა.

აღსანიშნავია, რომ მთავარი არხის ჟურნალისტმა პოლიცია იმავე დღეს გამოიძახა. როგორც გოგოხიამ თქვა, საპატრულო პოლიციის თანამშრომლებმა უთხრეს, რომ საქმე არა მათი, არამედ კრიმინალური პოლიციის კომპეტენცია იყო, დაემშვიდობნენ და წავიდნენ.

ფაქტს 22 ივლისს შინაგან საქმეთა მინისტრი გამოეხმაურა. ვახტანგ გომელაურმა რუსთავი 2-ის ეთერში თქვა, რომ ინფორმაცია ახლა მიიღო და აუცილებლად გაერკვევა.

გარდა ამისა, 23 ივლისს მთავარმა არხმა პროკურატურასაც მიმართა. ნიკა გვარამიას თქმით, ეს არის ძალიან სახიფათო და პირდაპირი სიგნალი, რომ მედიაზე ძალადობრივი ზემოქმედების ახალი ტალღა იწყება.

25 ივლისს სვანეთში მყოფმა კულტურის მინისტრმა ემა გოგოხია სვანეთიდან მიმართა და უთხრა, რომ არხის კუთვნილ მიკროფონს სწორედ აქ დაუბრუნებს. წინააღმდეგ შემთხვევაში, კულტურის მინისტრი თქვა, რომ მიკროფონს ჟურნალისტს სამ ოქტომბრამდე ვერ მიიღებს.

გაიგე მეტი: