თბილისის საქალაქო სასამართლოს მოსამართლე, დავით ნარიმანიშვილი აცხადებს, რომ ლიბერალური დემოკრატიის სადარაჯოზე პირველ რიგში მედია დგას და დითირამბების მოსმენას მკაცრი, თუნდაც დაუსაბუთებელი კრიტიკა ურჩევნია. ამის შესახებ მან Facebook-ზე დაწერა.

"საზოგადოებაში დღის წესრიგს ყოველთვის მედია ქმნის. შეშფოთებული ვადევნებ თვალს მათზე თავდასხმის ფაქტებს, მიუხედავად იმისა რომ 2004 წლიდან პირადად, არაერთხელ ვყოფილვარ მათი მხრიდან დაუსაბუთებელი სიუჟეტის თუ სტატიის "მსხვერპლი". თუმცა მედიისგან დითირამბების მოსმენას, მკაცრი, თუნდაც დაუსაბუთებელი კრიტიკის მოსმენა მირჩევნია. რადგან ღრმად მწამს, რომ ლიბერალური დემოკრატიის სადარაჯოზე პირველ რიგში მედია დგას, რადგან ერთადერთი ინსტიტუტია, რომლის მთავარი ფუნქცია დაფარულის, მიჩქმალულის თუ საეჭვოს განცხადებაა. ამიტომ თითოეულ მათგანს წარმატებას ვუსურვებ", — წერს ნარიმანიშვილი.

დავით ნარიმანიშვილი თბილისის საქალაქო სასამართლოს სისხლის სამართლის საქმეთა საგამოძიებო, წინასასამართლო სხდომისა და არსებითი განხილვის კოლეგიის მოსამართლედ საქართველოს იუსტიციის უმაღლესი საბჭოს 2020 წლის 26 ივნისის გადაწყვეტილებით დაინიშნა. მანამდე წლების განმავლობაში იყო გურჯაანის რაიონული სასამართლოს მოსამართლე, მოსამართლეობამდე კი, მუშაობდა პროკურორად და იურისტად.

დღეს, 27 ივლისს, სახელმწიფო უსაფრთხოების სამსახურთან ჟურნალისტებს სიტყვიერი შეურაცხყოფა მიაყენეს. მოქალაქე დავით ბაძგარაძე განსაკუთრებული აგრესიისით ფორმულას ჟურნალისტის მიმართ გამოირჩეოდა, რომელსაც უთხრა, რომ უნდა რცხვენოდეს იმ ტელევიზიაში მუშაობა, რომელიც დავით კეზერაშვილის დაფინანსებულია.

გუშინ, 26 ივლისს, მთავარი არხის ჟურნალისტმა, თათია წოწონავამ შინაგან საქმეთა სამინისტროს მიმართა. მას სოციალურ ქსელ ტიკ-ტოკში სიცოცხლის მოსპობით დაემუქრნენ. ჟურნალისტი ამბობს, რომ 5 ივლისის შემდეგ დაცულად არ გრძნობს თავს და გამოძიების დასრულებას ელოდება.

ამ ყველაფერს წინ უძღოდა 5 ივლისის ჰომოფობიური და ძალადობრივი კონტრაქცია, სადაც 50-ზე მეტს ჟურნალისტს ფიზიკურად გაუსწორდნენ. 11 ივლისს გაირდაიცვალა TV პირველის ოპერატორი, ლექსო ლაშქარავა, რომელსაც 5 ივლისს სცემეს.