სახელმწიფო უსაფრთხოების სამსახურის განცხადებით, 27 აფთიაქში ფსიქოტროპული მედიკამენტებით უკანონო ვაჭრობის ფაქტები გამოავლინეს. მათივე ინფორმაციით, თბილისში, ქუთაისში, ბათუმში, ლაგოდეხში, გურჯაანსა და საგარეჯოში გამოვლენილ აფთიაქებში ფსიქოტროპული მედიკამენტებს უკანონოდ სისტემატურად ყიდდნენ.

უწყების განცხადებით, 27 აფთიაქიდან ფსიქოტროპული მედიკამენტების რეალიზაციისათვის ავტორიზებული იყო მხოლოდ სამი, ხოლო დანარჩენს სათანადო ნებართვა არ გააჩნდა. მათივე თქმით, როგორც ავტორიზებულ, ასევე ნებართვის არმქონე აფთიაქებში სისტემატურად ხდებოდა სპეციალურ კონტროლს დაქვემდებარებული ფსიქოტროპული მედიკამენტების რეალიზაცია ექიმის დანიშნულების გარეშე.

უწყებაში ამბობენ, რომ საგამოძიებო მოქმედებები სასამართლოს განჩინების საფუძველზე აწარმოეს და შედეგად 34 პირისგან, ჯამში, 96-ჯერ განხორციელდა საკონტროლო შესყიდვა, რა დროსაც რეცეპტისა და მაიდენტიფიცირებელი მონაცემების გარეშე, ფარმაცევტებმა უკანონოდ გაასაღეს ფსიქოტროპული მედიკამენტები და ამასთან, არ გააფორმეს სალაროს აპარატის ქვითარი. მათივე თქმით, ყველა ხსენებულ ობიექტში მიმდინარეობს ჩხრეკა, რომლის დასრულების შემდგომაც ბიუჯეტთან ანგარიშსწორების მართლზომიერების დასადგენად ჩატარდება საგადასახადო რევიზია.

საქმეზე გამოძიება უკანონო სამეწარმეო საქმიანობის განხორციელებისა და უკანონო შემოსავლის ლეგალიზაციის მუხლებით მიმდინარეობს. უწყების განცხადებით, რეალიზებაში ჩართული ყველა პირის მიმართ დაიწყება სისხლისსამართლებრივი დევნა, ხოლო იურიდიული პირების მიმართ გატარდება კანონით გათვალისწინებული ღონისძიებები.