საქართველოს პარლამენტმა ცენტრალური საარჩევნო კომისიის თავმჯდომარე და წევრები ისევ ვერ აირჩია.

ცესკოს თავმჯდომარედ წარდგენილი ორი კანდიდატურა იყო — გიორგი კალანდარიშვილი და გიორგი სანტურიანი, კალანდარიშვილს პარლამენტის 81-მა წევრმა დაუჭირა მხარი, 7 წინააღმდეგი იყო, ხოლო სანტურიანს 3-მა წევრმა დაუჭირა მხარი, 8 წინააღმდეგი იყო.

რაც შეეხება საარჩევნო კომისიის წევრობის კანდიდატებს, აქ წარდგენილი იყვნენ გია ცაცაშვილი-ლელა ტალიური, გია ცაცაშვილმა 77 ხმა მიიღო, 7 წინააღმდეგი იყო, ლელა ტალიურმა 17 ხმა მიიღო, წინააღმდეგი არავინ ყოფილა. მაია ზარიძესა და თამარ სართანიას წყვილიდან, სართანიას ხმა 14-მა დეპუტატმა დაუჭირა, 5 წინააღმდეგი იყო, ზარიძეს მხარი 78-მა წევრმა დაუჭირა, 5 წინააღმდეგი იყო.

აღსანიშნავია, რომ პარლამენტში ამ საკითხს კენჭი უკვე მესამედ უყარეს, თუმცა ცესკოს თავმჯდომარისა და წევრების კანდიდატურები ჯერ კიდევ არ დამტკიცებულა.

საარჩევნო კანონმდებლობაში განხორციელებული ცვლილებებით, ცესკოს თავმჯდომარისა და წევრების არჩევას 100 ხმა სჭირდება. იმ შემთხვევაში, თუ 2/3 -ით არჩევა ვერ მოხერხდა, კენჭისყრა კვლავ 2/3-იანი კვორუმით უნდა ჩატარდეს და არჩევა თუ მაინც ვერ მოხერხდა, ამ შემთხვევაში, საჭირო იქნება 3/5 ანუ 90 ხმა. პარლამენტმა ცესკოს თავმჯდომარე და წევრები თუ ამ კვორუმითაც ვერ აირჩია, მაშინ არჩევისათვის 76 ხმა საკმარისი იქნება. ახალი კანონის მიხედვით, თუ ცესკოს თავმჯდომარე არჩეულია პარლამენტის სრული შემადგენლობის არანაკლებ ორი მესამედის უმრავლესობით, მისი უფლებამოსილების ვადაა 5 წელი, ხოლო სხვა შემთხვევაში − 6 თვე.