ნაშუაღამევია და ძილბურანში მყოფს გულმოსაკლავი წკმუტუნი ჩაგესმის. თვალების ფშვნეტით იღვიძებ და ოთხზე დამდგარ სილუეტს გაჰყურებ, რომელსაც, დარწმუნებული ხარ, რომ ერთადერთი რამ უნდა — საწოლზე ამობობღება და შენთან ერთად დაძინება. რატომ არ ამოგყავს? ოდესმე გიფიქრია, რომ შენს ცუგასთან ერთად ძილი შენთვისაც კარგია? როგორც აღმოჩნდა, საკითხზე არაერთი კვლევაა ჩატარებული და ყველა სწორედ ამაზე მიუთითებს. ძაღლთან ერთად ძილი სტრესსა და შფოთვას ამცირებს. ამასთან, ცუგები თურმე ძილთან დაკავშირებული სხვადასხვა პრობლემის მარტივად გადაჭრაშიც გვეხმარებიან.

მაშინ, მოდი, უფრო დეტალურად განვიხილოთ, რატომ არის ოთხფეხა მეგობრებთან ერთად დაძინება სასარგებლო.

1. კვლევის მიხედვით, ძაღლთან ერთად ძილი დაცულობისა და კომფორტულობის შეგრძნებას ქმნის

საკუთარ ცუგასთან საძინებლის გაზიარებით ძაღლის ბევრი პატრონი თავს უკეთ გრძნობს. პატრონების 56 პროცენტის თქმით, ოთხფეხა მეგობრებს მათ გვერდით სძინავთ. ქალების ძილის რუტინაზე ჩატარებული კვლევის მიხედვით კი, მათ ძაღლის გვერდით ძილის დროს უფრო აქვთ დაცულობის შეგრძნება, ვიდრე საწოლის კატასთან ან სხვა ადამიანთან გაყოფის დროს.

2. ძაღლის გვერდით ძილი დადებითად აისახება მენტალურ და ფიზიკურ ჯანმრთელობაზეც

2012 წელს ჩატარებული კვლევის მიხედვით, შინაურ ცხოველებთან სიახლოვე მენტალური ჯანმრთელობის პრობლემების, მაგალითად, სტრესის და შფოთვის შემსუბუქებაში გვეხმარება. ცხოველებთან ურთიერთობა დადებითად აისახება ფიზიკური ჯანმრთელობის ისეთ ფაქტორებზეც, როგორიცაა კორტიზოლის გამომუშავება, პულსისა და სისხლის წნევის რეგულირება. ამასთან, ეს სტრესთან დაკავშირებული ჰორმონების, ეპინეფრინისა და ნორადრენალინის გამომუშავებასაც აწესრიგებს. ასევე ამცირებს მარტოობის შეგრძნებასა და აგრესიას, მატებს ემპათიისა და ნდობის უნარს.

ფოტო: Michael Pettigrew / Dreamstime

3. ძაღლთან ერთად ძილი უძილობის პრობლემის მოგვარებაშიც გვეხმარება.

როცა თავს უსაფრთხოდ და დაცულად ვგრძნობთ, სტრესი კი შემსუბუქებულია, ცხადია, ჩაძინებაც უფრო მარტივდება. ასე რომ, თუკი უძილობასთან დაკავშირებული პრობლემა გაქვს, საძინებელში შენი ცუგა შემოიპატიჟე — შესაძლოა, სწორედ ეს ბეწვის გორგალია, რაც გჭირდება.

4. ჩვენთან ერთად ძილი სასარგებლოა ძაღლებისთვისაც

ცუგებს პატრონების გვერდით წოლა და ძილი ძალიან უყვართ. ასე თავს უფრო თბილად, კომფორტულად და ბედნიერად გრძნობენ. რაც მთავარია, თავს ოჯახის განუყოფელ წევრადაც აღიქვამენ. შესაბამისად, მხოლოდ ჩვენთვის როდია სასარგებლო ცუგებთან საწოლის გაყოფა.

საყურადღებო შენიშვნა: არის რამდენიმე ფაქტორი, რომლის უგულებელყოფაც არ შეიძლება; თუკი ძაღლთან ურთიერთობისას ალერგია გაქვს, მათთან ერთად ძილმა ეს, შესაძლოა, უფრო გაამწვავოს. ამასთან, მნიშვნელოვანია ცუგების ჰიგიენა და შესაბამისი აცრების ჩატარებაც. თუკი შენი ოთხფეხა მეგობარი ვერაფრით გადააჩვიე ძირს დაგდებულის ჭამას და ვერც ბანაობაზე იყოლიებ ხშირად, ამ შემთხვევაშიც ალბათ ლოგინზე ამოპატიჟებისგან თავის შეკავება აჯობებს. გასათვალისწინებელია ხასიათი და ჯანმრთელობის მდგომარეობა — როგორც ძაღლის, ასევე შენი.