პარტია საქართველოსთვის პოლიტსაბჭოს წევრის, დეპუტატ ანა ბუჩუკურის ინფორმაციით, ექსპრემიერ გიორგი გახარიას პარტია აქტიურად აწარმოებს წინასაარჩევნო კამპანიას და მალე თბილისის მერობის კანდიდატსაც დაასახელებენ.

"ჩვენ ძალიან აქტიურად ვხსნით ოფისებს, გვაქვს შეხვედრები საქართველოს მასშტაბით, ხედავთ კიდეც, ჩვენი გუნდის ლიდერი ძალიან აქტიურად დადის რეგიონებში და მივუყვებით — მიუხედავად იმ ქაოსისა, მათ შორის, პოლიტიკური ქაოსისა, რაც ქვეყანაში ხდება — ძალიან აქტიურად ჩვენ საქმიან დღის წესრიგს. ჩვენი კანდიდატი იქნება ყველგან, მათ შორის თბილისშიც, ძალიან ღირსეული, როგორიც ჩვენს მოსახლეობას შეეფერება", — განაცხადა ბუჩუკურმა TV პირველის ეთერში.

მან ისაუბრა ქართული ოცნების თბილისის მერობის კანდიდატზე, კახა კალაძეზეც. ბუჩუკური ამბობს, რომ კალაძე ღირსეული კანდიდატი და ღირსეული კონკურენტი იქნება.

"გუშინ კახი კალაძე იყო დასახელებული მმართველი პარტიის მხრიდან, რაც, პრინციპში, ლოგიკურიც იყო. იმიტომ, რომ პრინციპში კახი კალაძე არის ქართულ ოცნებაში დარჩენილთაგან ძალიან მაღალი რეიტინგის მქონე ადამიანი და ღირსეული კანდიდატი იქნება, შესაბამისად, ღირსეული კონკურენტი", — განაცხადა ანა ბუჩუკურმა.

20 ივლისს ქართულმა ოცნებამ თბილისის მერობის კანდიდატად კახა კალაძე წარადგინა.

გაიგე მეტი: