ევროპული საქართველოს გენერალური მდივანი, აკაკი ბობოხიძე აცხადებს, რომ ევროპული საბჭოს პრეზიდენტი, "შარლ მიშელი უნდა დავაბრუნოთ საქართველოში". ის ფიქრობს, რომ მას შემდეგ, რაც მიშელმა პარტიებს სამოქმედო გეგმა და სამომავლო რეფორმები პუნქტობრივად გაუწერა, ახლა უნდა დააწესოს სანქცია — რა მოხდება შეთანხმების დარღვევის შემთხვევაში.

"შარლ მიშელი უნდა დავაბრუნოთ საქართველოში. უნდა დავაბრუნოთ იმისთვის, რომ პირდაპირ გაიწეროს, თუ შეთანხმება ირღვევა, რა მოხდება ასეთ შემთხვევაში. თუ უარს იტყვის, მერე ვიფიქროთ სანქციებზე და ზომებზე? ჩვენს პარტნიორებს და შარლ მიშელს უნდა მოვთხოვოთ, დაიდოს, რა ხდება დარღვევის შემთხვევაში. ამ შეთანხმებაში ხომ ბანკირებიც მონაწილეობენ და კარგად გაიხსენონ, როცა ბანკი ადამიანს ხელშეკრულებას უდებს, იქვე იწერება, დარღვევის შემთხვევაში რა სანქციები ელოდება. ასევე, ქართულმა ოცნებამ უნდა იცოდეს, თუ ამ შეთანხმებას დაარღვევენ, ამას რა მოჰყვება", — განაცხადა აკაკი ბობოხიძემ TV პირველის ეთერში.

ევროპული საბჭოს პრეზიდენტი, შარლ მიშელი, საქართველოში დღეს იმყოფებოდა. მან მონაწილეობა მიიღო საერთაშორისო კონფერენციაში, რომლის ერთ-ერთი მთავარი თემა აღმოსავლეთ პარტნიორობის ასოცირებული ქვეყნების ევროკავშირთან ურთიერთობაა.