ჯანდაცვის მინისტრის, თამარ გაბუნიას განცხადებით, მალე ფაიზერის ახალი დოზები შემოვა და აჟიოტაჟი აღარ იქნება. მისივე თქმით, გუშინ ფაიზერის ვაქცინის მოწოდების პირველი, საწყისი ეტაპი იყო და რეგისტრაცია ძალიან სწრაფი ტემპით გაგრძელდება.

"გუშინ დიდი ნერვიულობა იყო ამ რეგისტრაციასთან დაკავშირებით. რეალურად ფაიზერის მილიონზე მეტი დოზის მოწოდება გუშინ დაიწყო, რომელიც ჩვენ უნდა მივიღოთ ძალიან მოკლე ხანში, გუშინ ეს იყო პირველი მოწოდება და გუშინ დაიწყო რეგისტრაცია.

ეს არ ნიშნავს, რომ გუშინ რეგისტრაცია დასრულდა და მეტს ვეღარ დავრეგისტრირდებით. ეს არის პირველი, საწყისი ეტაპი და გაგრძელდება ეს ამბავი ძალიან სწრაფი ტემპით, ანუ მომდევნო კვირიდან მე ვფიქრობ, ჩვენ გვექნება იმდენი დოზა უკვე ქვეყანაში, რომ აღარ იქნება მსგავსი [აჟიოტაჟი]", — განაცხადა მან იმედის დილაში.

გუშინ, 14 ივლისის Pfizer-ზე რეგისტრაცია 15:00 საათიდან უნდა დაწყებულიყო, თუმცა რამდენიმე საათის განმავლობაში პორტალი ისევ შეფერხებით მუშაობდა.

აღსანიშნავია, რომ დაავადებათა კონტროლისა და საზოგადოებრივი ჯანდაცვის ეროვნული ცენტრის ხელმძღვანელმა, ამირან გამყრელიძემ განაცხადა, რომ IT სამსახურებმა ყველაფერი გააკეთეს, რათა სარეგისტრაციო პორტალის მუშაობა ისევ არ შეფერხებულიყო.

Pfizer-ის 28 000 დოზა საქართველოში გუშინ, გვიან ღამით ჩამოვიდა. ამირან გამყრელიძის ინფორმაციით, Pfizer-თან გაფორმებული ხელშეკრულების მიხედვით ვაქციანა ქვეყანაში ეტაპობრივად, ყოველკვირეულად შემოვა. მისივე თქმით, ოქტომბრის ბოლომდე საქართველოში ჯამში მილიონ-ნახევარი Pfizer-ის ვაქცინის შემოტანა იგეგმება.