ეხო კავკაზას ცნობით, აზერბაიჯანი-სომხეთის საზღვარზე სროლა იყო. სომხეთის სამხედრო დეპარტამენტის თანახმად, შედეგად სომეხი ჯარისკაცი დაიღუპა, აზერბაიჯანელი კი დაიჭრა.

"თავიანთი საბრძოლო პოზიციების დასაწინაურებლად, აზერბაიჯანის შეიარაღებული ძალების ნაწილები ცდილობდნენ გამაგრებითი სამუშაოების ჩატარებას საინჟინრო აღჭურვილობის გამოყენებით. სომხური მხარის საპასუხო მოქმედებების შემდეგ, რომლებიც მიზნად ისახავდა ამ სამუშაოების შეჩერებას, აზერბაიჯანელმა სამხედროებმა სომხური პოზიციების მიმართულებით ცეცხლი გახსნეს. სროლის შედეგად, სომხეთის შეიარაღებული ძალების სამხედრო მოსამსახურემ ცეცხლსასროლი იარაღით სასიკვდილო ჭრილობა მიიღო. დანაკარგი აზერბაიჯანულ მხარესაც აქვს", — ნათქვამია სომხეთის თავდაცვის სამინისტროს განცხადებაში.

სომხეთის სამხედრო დეპარტამენტმა აზერბაიჯანული მხარე მორიგ პროვოკაციებში დაადანაშაულა და გააფრთხილა, რომ ყველა პასუხისმგებლობა აზერბაიჯანის სამხედრო-პოლიტიკურ ხელმძღვანელობას ეკისრება.

თავის მხრივ, აზერბაიჯანის თავდაცვის სამინისტრომ განაცხადა, რომ ორი ქვეყნის სახელმწიფო საზღვრის ნახიჩევანის მიმართულებით სომხეთის მხრიდან დაბომბვის შედეგად აზერბაიჯანელი ჯარისკაცი დაიჭრა.

თავდაცვის სამინისტროს ინფორმაციით, დაჭრილს პირველადი დახმარება გაუწიეს, რის შემდეგაც იგი საავადმყოფოში გადაიყვანეს. მათივე განცხადებით, ამ მიმართულებით ამჟამად სიტუაცია სტაბილურია.