Pfizer-ზე რეგისტრაციის დაწყებიდან საათზე მეტი გავიდა, სარეგისტრაციო პორტალი booking.moh.gov.ge კი ისევ არ მუშაობს. მიზეზის გასარკვევად On.ge ცდილობს დაავადებათა კონტროლისა და საზოგადოებრივი ჯანდაცვის ეროვნული ცენტრის ხელმძღვანელს, ამირან გამყრელიძეს დაუკავშირდეს, თუმცა ის ტელეფონს გვითიშავს.

Pfizer-ის ვაქცინაზე რეგისტრაცია დღეს, 14 ივლისის 15:00 საათიდან უნდა დაწყებულიყო.

ამირან გამყრელიძემ დღეს განაცხადა, რომ IT სამსახურებმა ყველაფერი გააკეთეს, რათა სარეგისტრაციო პორტალის მუშაობა ისევ არ შეფერხებულიყო.

Pfizer-ის 28 000 დოზა საქართველოში გუშინ, გვიან ღამით ჩამოვიდა. ამირან გამყრელიძის ინფორმაციით, Pfizer-თან გაფორმებული ხელშეკრულების მიხედვით ვაქციანა ქვეყანაში ეტაპობრივად, ყოველკვირეულად შემოვა. მისივე თქმით, ოქტომბრის ბოლომდე საქართველოში ჯამში მილიონ-ნახევარი Pfizer-ის ვაქცინის შემოტანა იგეგმება.