მიტროპოლიტი სტეფანე აცხადებს, რომ მათი, სასულიერო პირებისა და ეკლესიის მოწოდებების ფარგლებში არ შედიოდა ის რაც მოხდა. ასე ეხმიანება ის 5 ივლისს ნაცემი ოპერატორის გარდაცვალებას. მისი კომენტარით ის პასუხისმგელობას თავზე არ იღებს და ცდილობს დამნაშავედ ისევ თბილისი პრაიდის ორგანიზატორები გამოიყვანოს. მეტიც, ის არსებულ ვითარებას კომუნსიტური რეჟიმის გავრცელებას ადარებს და ამბობს, რომ მსხვერპლი მაშინაც იყო, როცა "ტოტალური იდეოლოგიის თავს მოხვევა ხდებოდა".

მაღალი იერარქიის სასულიერო პირი ამბობს, რომ "ვიღაცა, ვიღაცას რომ დაარტყამს, ეს არ ნიშნავს იმას, რომ სამშობლო არ უნდა დაცივცათ და არ უნდა ვთქვათ ის რაც სიმართლეა".

"ადამიანი, რომ გარდაიცვალა და რაღაცა ესეთი მოხდა, რაც არ არის აბსოლუტურად ჩვენი მოწოდების ფარგლებში. [...]

კომუნისტების მოსვლის დროს ცოტა იყო მსხვერპლი? იგივე ამბავი იყო. ანუ, როდესაც თავს მოხვევა ხდება, რაღაცა ისეთი ფორმაციისა და ისეთი იდეოლოგიისა, რომელიც არის ტოტალიტალური, იქ ხდება ისეთი სიტუაციებიც, როდესაც არის გარკვეული ფარგლებიდან გამოსული დამოკიდებულება", — განაცხადა მან ჟურნალისტებთან გარდაცვლილ ოპერატორზე საუბრისას.

ამავდროულად მიტროპოლიტი სამძიმარს უცხადებს გარდაცვლილის ოჯახს და ამბობს, რომ ასეთი რამ არ უნდა მოხდეს. ის იმ მრევლს აკრიტიკებს, რომელიც სწორედ საპატრიარქოს მოწოდებით გავიდა 5 ივლისს აქციაზე და ამბობს, რომ ზოგმა "ემოცია ვერ მოთოკა".

"ეს წუთია გავიგე და ძალიან მწუხარებით მინდა მივუსამძიმრო მის ოჯახს და ყველა იმ ადამიანს, ვინც მისი ახლობელია და ზოგადა საზოგადოებას. მე ვფიქრობ, რომ ასეთი რამე არ უნდა მოხდეს.

სამშობლოს დაცვა სხვა რამეა ზოგადად, რომ იცოდეთ და როცა შენ ემოციას ვერ თოკავ და სამშობლოს დაცვის საბაბით რაღაცას არასწორს აკეთებ, ეს არ ნიშნავს, რომ სწორია ეს მოქმედება", — განაცხადა მან.

ალექსანდრე ლაშქარავა დღეს, 11 ივლისს, დედამ სახლში გარდაცვლილი იპოვა. იგი ერთ-ერთია იმ ათობით მედიის წარმომადგენელს შორის, რომელსაც 5 ივლისს ძალადობრივი კონტრაქციის მონაწილეები ფიზიკურად გაუსწორდნენ. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. იგი რამდენიმე დღე საავადმყოფოში იმყოფებოდა და 10 ივლისს სახლში გაეწერა.

ალექსანდრე ლაშქარავასა და ჟურნალისტ მირანდა ბაღათურიას ძალადობრივი კონტრაქციის მონაწილეები თავს მოძრაობა სირცხვილიას ოფისში შეჭრის მცდელობისას დაესხნენ. ლაშქარავა ჯერ კიდევ საავადმყოფოში იმყოფებოდა, როცა On.ge-ს შემთხვევის დეტალები მოუყვა.

"უბრალოდ კიბეზე შეგვეფეთნენ, ჟურნალისტზე გაიწიეს ჯერ და შემდეგ ჩამქოლეს. არ ვიცი, 50 კაცი მირტყამდა, მთელი კიბის საფეხური, ზედა ნაწილი, ქვედა ნაწილი. რაღაც ნაწილი ავიდა ზევით, დავიწყე გაყოლა. რამდენიმე სართულზე იყვნენ ესენი, რამდენიმე სართულმა მცემა. ჩამაგდეს, ქვევით გადამაგდეს და ისე მცემეს, ტექნიკა დააქუცმაცეს, არ ვიცი, ასეთი შთაბეჭდილება მრჩება, რომ უნდოდათ მედია გამოეყვანათ მწყობრიდან [...]

ახლა მე მეძახიან ამოცნობაზე მოდიო, მაგრამ ორი დღე კიდევ აქ უნდა ვიყო, ვერ გავდივარ და იდენტიფიცირება წარმოუდგენელია მოვახდინო, იმიტომ, რომ 50-60 ადამიანი იყო", — ყვებოდა ლაშქარავა 6 ივლისს, თავდასხმიდან მეორე დღეს.

იმ ათობით ადამიანიდან, რომლებიც მოძრაობა სირცხვილიას ოფისში შეჭრას ცდილობდნენ და TV პირველის გადამღებ ჯგუფს თავს დაესხნენ, ჯერჯერობით მხოლოდ ორია დაკავებული. აკაკი ნაკაშიძისა და თორნიკე დავლაშელიძის სასამართლო პროცესი 9 ივლისს გაიმართა და მათ აღკვეთის ღონისძიების სახით პატიმრობა შეეფარდათ. დაცვის მხარე ითხოვდა მათ გათავისუფლებას 2 000-2 000 ლარიანი გირაოთი.

"ჩემი აზრი მინდოდა დამეფიქსირებინა, როგორც მართლმადიდბელი კაცის და მერე ქაოსმა მოიცვა ყველაფერი [...] ემოციებიდან გამომდინარე მოხდა", — განაცხადა აკაკი ნაკაშიძემ სასამართლო პროცესზე.

"ჩემი ცხოვრებისეული წესიდან გამომდინარე, სადაც ვყოფილვარ საზოგადოებაში, ვერავინ იტყვის რომ მკვლელი ვარ, ქურდი ვარ, ყაჩაღი ვარ, საერთოდ არ მახასიათებს ასეთი რაღაცები... რაც შეეხება ძალადობას, არავის მომართ განმიხორციელებია", — უთხრა მოსამართლეს თორნიკე დავლაშელიძემ.

პროკურატურამ ნაკაშიძესა და დავლაშელიძეს, ასევე მთავარი არხის გადამღებ ჯგუფზე თავდასხმის ბრალდებით დაკავებულებს, თემურ ხარაულსა და ილია ქებაძეს ბრალდება საქართველოს სისხლის სამართლის კოდექსის 154-ე მუხლის მეორე ნაწილით (ჟურნალისტისათვის პროფესიულ საქმიანობაში უკანონოდ ხელის შეშლა, ჩადენილი ძალადობის მუქარით), 156-ე მუხლის მე-2 ნაწილის ა ქვეპუნქტით (ადამიანის დევნა პროფესიულ მოღვაწეობასთან დაკავშირებით, ჩადენილი ძალადობით) და 225-ე მუხლის მეორე ნაწილით (სექსუალური ორიენტაციისა და გენდერული იდენტობის ნიშნით შეუწყნარებლობის მოტივით ჯგუფურ ძალადობაში მონაწილეობა) წარუდგინა. ბრალის დამტკიცების შემთხვევაში მათ 4 წლიდან 6 წლამდე პატიმრობა ემუქრებათ.

აღანიშნავია, რომ ამ დრომდე დაკავებულები არ არიან ძალადობრივი აქციის ორგანიზატორები.

გაიგე მეტი:

• ის ქმედებები, რაც თქვენ წარგედგინათ, დანაშაულია, არის სრული სიბნელე და სირცხვილი — მოსამართლე ძალადობრივი კონტრაქციის მონაწილეებს