თავისუფალი დემოკრატების თავმჯდომარე, თამარ კეკენაძე 5 ივლისის ძალადობრივ კონტრაქციაზე სასტიკად ნაცემი TV პირველის ოპერატორის, ალექსანდრე ლაშქარავას გარდაცვალების გამო მთავრობის გადადგომას მოითხოვს.

"საქართველოს ხელისუფლებას არათუ არ შეუძლია საკუთარი მოქალაქეების დაცვა, არამედ თვითონ არის ძალადობრივი ქმედებების წამახალისებელი. შესაბამისად, თავისუფალი დემოკრატები მოვითხოვთ გადადგეს მთავრობა პრემიერ ღარიბაშვილის მეთაურობით, დაინიშნოს ახალი არჩევნები. ამავდროულად, დადგეს ყველა იმ სასულიერო თუ საერო პირის პასუხისმგებლობის საკითხი ვინც ღიად და საჯაროდ მოუწოდებდა მოქალაქეებს ძალადობისკენ.

ლექსოს გარდაცვალება არ არის მარტო ერთი ოჯახის ტრაგედია, სამწუხაროდ ის გახდა დაუსჯელი, გაუგონარი და ღიად წახალისებული ძალადობის მსხვერპლი. მხოლოდ კონკრეტული შემსრულებლების დასჯა არ არის საკმარისი", — აცხადებს კეკენაძე.

დღეს, 11 ივლისს გარდაიცვალა TV პირველის ოპერატორი, ალექსანდრე ლაშქარავა. იგი ერთ-ერთია იმ ათობით მედიის წარმომადგენელს შორის, რომელსაც 5 ივლისს ძალადობრივი კონტრაქციის მონაწილეები ფიზიკურად გაუსწორდნენ. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. იგი რამდენიმე დღე საავადმყოფოში იმყოფებოდა და შემდეგ სახლში გაეწერა. დღეს დილით, იგი საკუთარმა დედამ იპოვა გარდაცვლილი.

გაიგე მეტი: