ზუგდიდის ყოფილი მერი, გეგა შენგელია გიორგი გახარიას პარტიას საქართველოსთვის შეუერთდა. ამის შესახებ მან საკუთარ Facebook გვერდზე დაწერა.

"ჩემთვის თანამდებობაზე ყოფნა არასდროს ყოფილა თვითმიზანი, ჩემი მისწრაფება ყოველთვის იყო ზუგდიდელებთან ერთად მეშენებინა უკეთესი ზუგდიდი და როცა ამ საქმეში ვერ გრძნობ სათანადო მხარდაჭერას, რთულია მხოლოდ ადგილობრივი რესურსებით იმ პროგრესის შენარჩუნებაც კი, რომელიც გვქონდა ბოლო 2 წლის მანძილზე", — წერს ის.

ის პოსტში ქართულ ოცნებას აკრიტიკებს და აცხადებს, რომ ამ პერიოდის მანძილზე მისთვის მიუღებელი გახდა მმართველი პარტიის ხელმძღვანელთა ქმედებები, რიტორიკა და "პრიმიტიულ ტყუილებზე" დაფუძნებული ბრალდებები ყოფილი თანაგუნდელების მიმართ, რომელმაც ორკესტრირებული ხასიათი მიიღო.

"სწორედ ამიტომ, დღეს მე ღრმად ვარ დარწმუნებული, რომ გიორგი გახარიასთან და იმ პოლიტიკურ გუნდთან ერთად, რომელიც გაერთიანდა საქართველოსთვის, მნიშვნელოვან პროგრესს მივაღწევთ ქვეყნის მისწრაფებების შესასრულებლად", — ამბობს შენგელია.

ზუგდიდის მერმა თანამდებობა 2021 წლის 17 მაისს დატოვა. წასვლის შესახებ ინფორმაცია მან ფეისბუქის საკუთარ გვერდზე გაავრცელა და გადადგომის მიზეზად შექმნილი პოლიტიკური ვითარება დაასახელა. შენგელია ზუგდიდის მერის თანამდებობას 2019 წლიდან, ამავე წელს ჩატარებული მერის რიგგარეშე არჩევნებში გამარჯვების შემდეგ იკავებდა.

ყოფილმა პრემიერმინისტრმა ახალი პარტია საქართველოსთვის და გუნდი 9 ივნისს წარადგინა.