მიმდინარე წლის ივნისში, გასული წლის იმავე თვესთან შედარებით, საქართველოში უცხოეთიდან 286,8%-ით მეტი, 146 664 უცხოური ვიზიტი განხორციელდა — ტურისტთა ეს რაოდენობა პანდემიის პერიოდში უპრეცენდენტოდ მაღალია. თუმცა, აქვე უნდა აღინიშნოს, რომ ეს მაჩვენებელი 2019 წლის იმავე პერიოდის მონაცემს 80%-ით ჩამორჩება.

ივნისში განხორციელებული უცხოური ვიზიტების 91% ტურისტული ტიპის იყო — ეს ნიშნავს იმას, რომ ვიზიტორებმა საქართველოში მოგზაურობისას მინიმუმ ერთი ღამე გაათენეს. ასევე, აღსანიშნავია, რომ მთლიანი ვიზიტების ნახევარზე მეტი, 52,5% საჰაერო გზით განხორციელდა, რაც საქართველოში საჰაერო მიმოსვლის გააქტიურებაზე მიანიშნებს.

მიმდინარე წლის ივნისში ყველაზე მეტი ვიზიტორი თურქეთიდან, ისრაელიდან და უკრაინიდან შემოვიდა. ამ ქვეყნებიდან შემოსულმა ტურისტებმა მთლიანი ვიზიტების 41,5% განახორციელეს.

რაც შეეხება მიმდინარე წლის პირველი ექვსი თვის მონაცემებს, სტატისტიკა აჩვენებს, რომ 2021 წლის იანვარ-ივნისში საქართველოში სულ 464 126 უცხოური ვიზიტი განხორციელდა, რაც გასული წლის იმავე პერიოდის მონაცემს 62,2%-ით ჩამორჩება.

შეგახსენებთ, რომ კორონავირუსით გამოწვეულმა პანდემიამ ტურიზმის ინდუსტრია მნიშვნელოვნად დააზარალა. 2020 წელს უცხოური ვიზიტების რაოდენობა წლიურად 80%-ით შემცირდა და 1,5 მილიონი შეადგინა. შესაბამისად, შემცირდა ტურიზმიდან შემოსული თანხებიც — ეროვნული ბანკის გათვლებით, გასულ წელს ტურიზმის სექტორმა უცხოელი ვიზიტორებისგან 2,7 მილიარდით ნაკლები, 541,7 მილიონი დოლარის შემოსავალი მიიღო. რაც შეეხება მიმდინარე წლის შემოსავლებს, 2021 წლის იანვარ-მაისში უცხოური ტურიზმიდან 176,5 მილიონი დოლარის შემოსავალი მივიღეთ.

ასევე იხილეთ: