საქართველოს პრემიერმინისტრი, ირაკლი ღარიბაშვილი ამბობს, რომ ქვეყნის საგარეო პოლიტიკური კურსი არის ევროატლანტიკური, რომელიც შეუქცევადია და არ შეიცვლება. აღნიშნული განცხადება პრემიერმინისტრმა ევროკომისარ ოლივერ ვარჰეისთან ერთობლივი პრესკონფერენციის დროს გააკეთა.

"მე კიდევ ერთხელ მსურს, დავადასტურო, რომ ჩვენი ქვეყანა, ჩვენი მოსახლეობის აბსოლუტური უმრავლესობა, თითქმის 80%, მხარს უჭერს ქვეყნის ევროინტეგრაციას. ბატონო კომისარო, ჩვენი მთავრობის და ჩვენი გუნდის გადაწყვეტილება იყო რამდენიმე წლის წინ, როდესაც ჩვენ კონსტიტუციაში ცვლილებები განვახორციელეთ, მაშინ ჩვენ განვსაზღვრეთ ჩვენი ქვეყნის საგარეო პოლიტიკური კურსი და ყველანი შევთანხმდით, რომ ჩვენი საგარეო პოლიტიკური კურსი არის ევროატლანტიკური კურსი, რომელიც არის შეუქცევადი, რომელიც არ გადაიხედება და არ შეიცვლება. ამ პროცესში ჩვენ კარგად გვესმის, რომ ქვეყანა, რომელიც არის ჯერ კიდევ ახალგაზრდა დემოკრატია, არა ერთი მუდმივი, პერმანენტული გამოწვევების წინაშე დგება, მაგრამ ეს ჩვენ არ გვაშინებს, რადგან კარგად გვესმის, მტკიცედ გვწამს და გვჯერა, რომ ჩვენ ამ გზაზე გავივლით წარმატებულად და გვჯერა, რომ ერთ დღეს გავხდებით ევროკავშირის სრულუფლებიანი წევრი. მინდა, კიდევ ერთხელ მადლობა გადაგიხადოთ", — ამბობს ღარიბაშვილი.

მისივე თქმით, ევროკომისართან ისაუბრა, ასევე ოკუპაციის საკითხებზეც, რომელიც ძალიან დიდი ტვირთია და მძიმე გამოწვევა საქართველოს მოქალაქეებისთვის, რუსეთმა კი უნდა შეასრულოს ნაკისრი ვალდებულებები, გაიყვანოს ჯარები ქვეყნის ტერიტორიებიდან.